"Murgu taoist i Laoshanit" është një tregim mitologjik nga libri?Çudirat e shënuara në Liaozhai?, të shkrimtarit kinez të shekullit të 17-të, Pu Song Ling. Në të flitet për veprimin e një shkollari kureshtar:

Në qytezën tonë, jetonte dikur një shkollar, të cilin e quanin Vang Çi, që do të thoshte i shtati nga vëllezërit e familjes Vang. Ai admironte magjitë qysh në vogëli. Një ditë, ai mori vesh se kishte shumë shenjtorë në malin Laohan dhe u ngjit në një nga majat e tij, ku iu lut një murgu taoist që ta mbante atë si nxënës. Murgu i tha: "Më duket se ti je i përkëdhelur dhe kam frikë se nuk do të durosh vuajtjet." Vang Çi iu përgjigj: "Unë mund të duroj çdo vuajtje." Murgu pranoi dhe e mbajti që ta provonte.

Të nesërmen në mëngjes, murgu e thirri Vang Çi pranë, i dha një sëpatë dhe i tha të shkonte për të prerë drurë së bashku me të tjerët. Vang Çi pranoi me respekt. Pas një muaji, i kishin dalë flluska në të dy duart dhe në të dy këmbët. Ai mezi i duronte dhe i lindi mendimi për të ikur.

Pasi kaloi edhe një muaj tjetër, Vang Çi nuk duronte dot më, dhe murgu nuk kishte ndër mend t'i mësonte ndonjë magji. Ai iu drejtua murgut dhe i tha: "Unë kam ardhur te ju nga një vend i largët. Ju duhet të më mësoni të paktën një magji të thjeshtë që të qetësohet zemra ime. Unë punova për dy a tre muaj te ju, duke dalë herët dhe duke u kthyer vonë, bile punova vetëm duke prerë drurë."

Murgu ia ktheu: "Kam thënë që në fillim se ti nuk do të durosh vuajtjet. Atëherë, ik në shtëpi nesër në mëngjes." Vang Çi iu lut: "Më mësoni një magji sado të vogël, që të tregojë se nuk kam ardhur kot te ju." "Çfarë magji e dëshiron të mësosh?" "Kam parë disa herë se asnjë mur nuk mund t'ju pengojë dhe ju kaloni duke e tejshpuar atë. Mua më mjafton të mësojë vetëm këtë magjie." Murgu buzëqeshi dhe ra dakord. Ia mësoi formulën magjike, i kërkoi ta lexonte përmendsh dhe thirri: "Futu tani në këtë mur!" Por Vang Çi qëndroi përballë murit dhe nuk guxonte. Murgu tha: " Provo një herë, futu!" Vang Çi bëri ngadalë disa hapa drejt murit dhe u pengua nga muri. Murgu tha: "Ule kokën dhe vërsulu shpejt drejt murit! Mos ngurro!" Vang Çi u spraps disa hapa larg murit, pastaj u vërsul shpejt drejt tij, e si rezultat, u fut brenda murit dhe doli në anën tjetër të tij. Vang Çi u gëzua pa masë dhe falenderoi mësuesin e tij. Murgu i tha: "Shko në shtëpi dhe bëhu njeri i ndershëm. Po ta shfrytëzosh për qëllime të këqija, kjo magji do të mbetet e pafuqishme."

Vang Çi u kthye në shtëpi dhe i tha së shoqes se ai kishte mësuar një magji dhe, këtej e tutje, asnjë mur nuk mund ta pengonte atë, sado i fortë që të ishte. E shoqja nuk besonte. Vang Çi lexoi përmendsh fonmulën magjike?u spraps disa hapa dhe u vërsul drejt murit të dhomës. U dëgjua një zhurmë përplasjeje dhe Vang Çi ra përdhe. E shoqja e ngriti dhe pa se i kishte dalë në ballë një gungë sa e madhe, sa një vezë pule.

(Zheng)