Në "Dele Alpi" rishfaqet një emër i njohur. Aleks del Piero bën debutimin e tij në këtë kampionat, me një dygolësh të rëndësishëm. Në 45 minuta, i saktë në goditjen e tij të 11-metërshit dhe i pakapshëm në ekzekutimin e goditjes së dënimit nga rreth 20 metra. Dy gola që i dhanë fitoren Juves ndaj Askolit. Në të vërtetë nuk ishte një Juventus i mirë, por gjithsesi fitues. Kapiteni bardhezi luajti nga fillimi deri në fund, pasi Kapelo zëvendësoi Ibrahimoviçin me Trezegenë.

Milani duhet të përveshë mëngët. Në Gjenovë nuk ka mjaftuar goli i zhbllokimit të rezultatit nga Xhilardino, as një Shevçenko i palodhur. Novelino, që vjet ka humbur në katër ndeshje përballë Milanit (kampionat dhe Kupë Italie), i kishte marrë masat mirë: vendos Zaulin të markojë Pirlon. Bonacoli shënon sërish, si shtatë ditë më parë. Ndërsa Toneto shndërron në gol një krosim të bukur të Dianës, duke e detyruar Didën ta nxjerrë topin për herë të dytë nga porta. Përmbysje dhe parakalim i papritur nga blukaltrit. Tani parashikohet një javë "zjarri" për Ançelotin, kur pasnesër do të presë Lacion në "San Siro", një ndeshje ku nuk mund të gabohet.

Ditë e vështirë për skuadrat e përkushtuara në Ligën e Kampioneve. Udineze kalon në epërsi për herë të tretë radhazi, me anë të Muntarit (në tri javë kampionat), por më pas shkatërrohet nga Fiorentina në Firence. Toni, autor i një dygolëshi, nuk pushon së shënuari. Sikundër dhe Fiore. Gol të bukur shënoi edhe Donadeli me goditje dënimi dhe Prandeli mund të shijojë. Dhe jo vetëm për vendin e dytë. Fiorentina më në fund gjeti një portier: Frei pret gjithçka dhe shuan çdo mundësi përmbysjeje nga friulanët. Kozmi inatoset dhe ndëshkohet me karton të kuq. Në "Olimpiko", Di Kanio feston ndeshjen e tij të 100-të me Lacion, me dy pasime për gol për Rokin dhe Pandevin, që gjunjëzuan Trevizon. Në fund, janë tri skuadra me 0 pikë: Trevizo, Empoli e Rexhina.