Turneu "China Open" u hap më 10 shtator dhe do të përfundojë më 25 shtator. Gjatë 16 ditëve, më se 400 lojtarë të ardhur nga vende të ndryshme do të zhvillojnë ndeshje për titullin kampion. Ndër këta lojtarë ka shumë yje botërore, si Sharapova, motrat Uilliams, Ferrero, Nadal etj. Zv-drejtori ekzekutiv i Komitetit Organizator të turneut "China Open" dhe zv-drejtori i Drejtorisë së Sporteve të Pekinit Li Jinkang shprehu kënaqësinë e tij për pjesëmarrjen e shumë yjeve botërore në turneun "China Open". Li Jinkang tha se një garë ndërkombëtare tenisi me nivel të lartë mund të ngrejë popullaritetin e një qyteti. Shumë qytete të mëdha të botës kanë turneun e vet të tenisit të klasës së parë, për shembull Parisi organizon turneun e tenisit "France Open", Melburni ka garën e tenisit "Australia Open". Organizimi i një gare ndërkombëtare tenisi përputhet me kërkesat e zhvillimit të qytetit të Pekinit. Ai tha:

"Sipas projektit të zhvillimit të Pekinit, Pekini do të jetë një qytet ndërkombëtar sportiv. Për të arritur këtë objektiv, Pekini do të organizojë disa gara ndërkombëtare me nivel të lartë. Turneu i tenisit `China Open' është pikërisht një garë e tillë. Tani ky turne ka tërhequr vëmendjen e gjerë vendëse e ndërkombëtare."

Turneu i tenisit "China Open" ka pajisje të përparuara, si për shembull fusha qendrore e tenisit e ndërtuar me 6 milionë dollarë amerikanë që mund të mbajë 10 mijë shikues. Numri një aziatik i tenisit, lojtari tajlandez Sriçapan që merr pjesë për herë të dytë në turneun "China Open" është i mendimit se fusha qendrore e tenisit është fusha më e mirë në Azi.

Kyçi i një gare me nivel të lartë është nëse ajo mund të tërheqë lojtarë të nivelit të lartë. Vitin e kaluar, turneu "China Open" tërhoqi lojtarë të famshëm si Safin, Sriçapan, Sharapova etj. Këtë vit, nëpërmjet përpjekjeve të komitetit organizator, më shumë yje botërore të tenisit kanë ardhur në Pekin, për shembull tenistët spanjollë Nadal, Ferrero, Moya, tenistet amerikane Davenport, motrat Uilliams, rusja Sharapova etj. Kryeekzekutivi i ATP-së Mark Miles tha se për një turne të ri si ky, është një sukses i madh që mund të tërheqë kaq shumë lojtarë të famshëm. Lojtari spanjoll dhe kampioni i turneut të tenisit "France Open" për vitin 2003 Ferrero tha se ai merr pjesë në garën "China Open" për shkak të magjisë së kulturës kineze dhe punës së mirë organizatuese.

Li Jinkang tha se objektivi i organizatorëve të turneut "China Open" është që ky turne të jetë gara e 5-të e madhe e tenisit në botë. Megjithëse tani turneu "China Open" nuk mund të krahasohet me 4 turnetë kryesore botërore të tenisit, organizatorët nuk do të heqin dorë nga ky objektiv. Ai tha:

"Tani kemi distancë të madhe me objektivin për të qenë turneu i 5-të i madh i tenisit në botë. Por nuk do të lëkundemi nga ky objektiv. Jam i bindur se nëpërmjet përpjekjeve tona, ai do të realizohet." (Fani)