dëgjoni

Në rafshnaltën Çinhai-Tibet mbi 4000 metra mbi nivelin e detit, gjenden të përhapur rezervuarë të mëdhenj natyrorë, të formuar nga uji që krijohet nga shkrirja e akullnajave. Këta rezervuarë furnizojnë me ujë 10 lumenj të Kinës, si lumin Jance, lumin Lanchagjian, etj. Gjatë zhvillimit të krahinave perëndimore të Kinës Rajoni Autonom i Tibetit e ka forcuar punën për mbrojtjen e ujit të lumenjve, liqeneve dhe të burimeve të tjera ujore brenda rajonit, duke ruajtur cilësinë e lartë të ujit të " kullës së ujit të Azisë"

Ditët e fundit Drejtoria e Mbrojtjes së Mjedisit të Rajonit Autonom të Tibetit bëri të ditur se cilësia e ujit të lumenjve dhe të liqeneve të Tibetit është brenda standardit të përcaktuar nga shteti.

Për të mbrojtur burimet e pasura ujore të vendit tonë, vitet e fundit Kina ka investuar shumë në veprën e zhvillimit të përgjithshëm bujqësor gjatë rrjedhave të mesme të lumenjve Yaluchabu, Lhasa dhe Yeicu dhe ka arritur rezultate të dukshme në mbrojtjen e mjedisit ekologjik të këtyre rrjedhave. Qeveria kineze ka hartuar një politikë afatgjatë për inkurajimin e mbjelljes së pemëve dhe të barërave në kodrat e lëna djerre. Sipas njoftimeve të Drejtorisë së Ekonomisë Pyjore të Rajonit Autonom të Tibetit, nga viti 1990 deri në vitin 2004 janë shtuar 20 mijë hektarë lëndina dhe janë sistemuar 25 mijë hektarë ranishte.

Krahas këtyre, Rajoni Autonom i Tibetit ka punuar për mbrojtjen e brezave pyjorë natyrorë në rrjedhën e sipërme të Lumit Jance. Vetëm në vitin 2004 u investuan 237 milionë juanë dhe u ndërtuan 2253 hektarë breza pyjorë ekologjikë.

Drejtori i Drejtorisë së Mbrojtjes së Mjedisit të Rajonit Autonom të Tibetit, Zhang Yunce tha se Tibeti ka ndërtuar një rajon të mbrojtjes ekologjike në burimin e Lumit Yaluchanbu dhe po planifikohet ndërtimi i rajoneve të tjera të këtij lloji në burimet e lumenjve të tjerë. Deri tani Tibeti ka ndërtuar 15 rajone shtetërore ose rajonale të mbrojtjes natyrore në luginat Ciantan e Yaluchanbu dhe në rrëzë të malit Xhuglungma. Sipërfaqja e përgjithshme e këtyre rajoneve të mbrojtjes natyrore ka arritur në 407 mijë kilometra katrorë, duke përbërë 30% të sipërfaqes së përgjithshme të të gjithë rajonit autonom.

Vitet e fundit Tibeti ka investuar 50 milionë juanë për sistemimin e ujërave dhe të gazrave të përdorur, të nxjerrë nga fabrika e birrës e Lhasas, nga centrali elektrik Yanbajin, nga fabrika e lëkurës e Lhasas, nga spitali popullor i rajonit autonom, nga fabrika e çimentos dhe nga fabrika farmaceutike e rajonit autonom. Në vitin 2004 u mbyllën 8 miniera me efektivitet të ulët prodhimi.

Që kur filluan punimet për ndërtimin e hekurudhës Çinhai-Tibet, sektorët e ndërtimit kanë nënshkruar çdo vit marrëveshje për mbrojtjen e mjedisit me sektorët përkatës të Tibetit dhe të provincës Çinhai dhe i konsiderojnë burimet e tre lumenjve, si Jance, Lumi i Verdhë dhe Lumi Lanchuajian, si aspektet kryesore të punës për mbrojtjen e mjedisit. Gjatë punimeve janë ndërtuar më shumë ura në vend të tuneleve dhe të rrugëve, duke mbrojtur në mënyrë efikase tokat e lagëta, lumenjtë dhe liqenet e rrafshnaltës.

Tibeti ka përshpejtuar edhe vënien në jetë të strategjisë së zëvendësimit energjetike, ka bërë përpjekje të mëdha për shfrytëzimin e energjisë ujore, të energjisë së diellit dhe të energjisë së erës, për të pakësuar shpenzimin e drurëve të zjarrit. Deri tani në gjithë Rajonin Autonom të Tibetit janë ndërtuar mbi 300 centrale të vogla elektrike dhe është zgjidhur problemi i mungesës së energjisë elektrike për 500 mijë fshatarë e blegtorë tibetianë. Deri në vitin 2004 kanë filluar punimet për ndërtimin e 138 hidrocentraleve të vogla në Tibet dhe 61 prej tyre janë ndërtuar e janë vënë në shfrytëzim. (Zhang)