Në gusht të këtij viti u zhivllua në Izmir të Turqisë Universiada e 23-të Botërore. Në finalen e vrapimit 100 metra për meshkuj, spektatorët janë tërhequr nga një djalë me syze, që i la të gjithë konkurruesit e tjerë prapa dhe mbërriti i pari në fund. Ky vrapues është Hu Kai, student i Universiteti Qinghua të Kinës.

Me rezultatin e tij në këtë universiadë, 10 sekonda e 30 të dhjetat, Hu Kai do të kishte siguruar një hyrje në gjysmëfinalet e vrapimit 100 metra për meshkuj të Kampionatit Botëror të Atletikës të këtij viti, që u zhvillua në Helsinki. Kjo nuk është e lehtë për një sportist amator. Duke folur për garën e Izmirit, Hu Kai u duk pak i mallëngjyer. Ai tha:

"Para pjesëmarrjes në universiadë, kisha analizuar rezultatet e kaluara dhe mendova se isha në gjendje të fitoja medalje. Prapëseprapë, fitimi i medaljes së artë më mallëngjeu shumë, sepse sipas kujtesës sime, jam i pari kinez i shpallur kampion në garën e vrapimit 100 metra në lojëra botërore."

Hu Kai lindi më 1982 në qytetin bregdetar Qingdao të Kinës lindore. I ati, kur ishte i ri, i kryente100 metra brenda 12 sekondash. Hu Kai trashëgon talentin e të atit në vrapimin e distancave së shkurtra dhe e ka shfaqur atë qysh në shkollën e mesme. Por suksesi i tij i sotëm u detyrohet përpjekjeve e tij dhe përgatitjeve me zell në universitetin Qinghua.

Në vitin 2001, Hu Kai u regjistrua me provim në Universitetin Qinghua dhe studion në Degën e Administrimit Ekonomik. Nga ky universitet i famshëm kanë dalë shumë shkencëtarë të nivelit të parë dhe politikanë. Por për një kohë të gjatë, shkollat e larta kineze nuk kishin treguar interes për "krijimin e skuadrave sportive të nivelit të lartë", sepse në mendësinë e shumë intelektualëve tradicionalë kinezë, universiti është trualli i studimit të diturisë, kurse sporti është vetëm një prirje e studentëve. Hu Kai ka fat të bardhë. Disa vjet para hyrjes së tij në Universitetin Qinghua, shkollat e larta kineze filluan të mendonin përsëri për pozitën e sportit në universitet dhe ishin të ndërgjegjshëm që edhe potenciali sportiv ka të bëjë me cilësinë dhe famën e një universiteti. Në këtë rrethanë, disa universitete të famshme kineze filluan ta përfshinin në planet e zhvillimit të shkollës përgatitjen e sportistëve dhe të skuadrave sportive të nivelit shtetëror. Në këtë fushë, Universiteti Qinghua ka ecur përpara. Profesori Chen Weiqun, drejtor i Katedrës së Edukimit Fizik të Universitetit Qinghua shpjegoi ndryshimin e konceptit. Ai tha:

"Shkollat e larta kineze përgatitnin në të kaluarën vetëm sportistë të nivelit amator. Qysh nga viti 1994, kemi bërë kërkime se a do të mund të përgatitim sportistë studentë të nivelit shtetëror, të cilët do të ndjekin kurset e specialitetit në universitet, dhe do të pranonin stërvitje profesionale sportive."

Në bazë të këtyre kërkimeve, qysh nga viti 1998 Universiteti Qinghua, nga njëra anë pranoi studentë me talent sportiv dhe nga ana tjetër, ka ftuar trajnerë e sportistë të skuadrave shtetërore të punojnë si pedagogë dhe të stërvitin studentët me talent sportiv në shkollë. Veprimi i Universitetit Qinghua që lidh edukimin fizik me studimin quhet në qarqet e arsimit të lartë të Kinës "Moda Qinghua".

Hu Kai është favorizuar nga Moda Qinghua. Pas hyrjes në universitet, ai hyri në skuadrën atletike. Trajneri i tij ishte trajner i skuadrës shtetërore kineze. Nën drejtimin e trajnerit të famshëm, Hu Kai e ka ngritur shpejt nivelin e tij dhe është shpallur disa herë kampion kombëtar.

Hu Kai tha: "Në sajë të kësaj mode, talenti sportiv i studentëve nuk do të mbetet i fshehur. Studentët kanë mundësi të kontaktojnë me trajnerë të nivelit të lartë. Në qoftë se ngulet këmbë në këtë modë, nuk do të mbetet ëndërr që shkollat e larta kineze të bëhen djep i kampionëve olimpikë."

Pavarësisht nga potenciali i madh, Hu Kai nuk dëshiron të bëhet një sportist profesional. Ëndrra e tij është të merret me biznesin. Për këtë ai është gati të ndjekë edhe studime pasuniversitare. Ai tha se tjetër favor i modës Qinghua është dhënia personave me talent sportiv e një tjetër zgjedhjeje krahas sportit profesional. (Wang Lei)