2. Kursi bazë dhe përpjekjet e qeverisë kineze për zgjidhjen e problemit të Tajvanit

Të dashur dëgjues, mirësevini në konkursin e njohurive: "Tajvani-ishulli margaritar i Kinës". Në emisionin e kaluar, ju folëm për faktin historik, që ishulli i Tajvanit është një pjesë e territorit të Kinës dhe për prejardhjen e problemit të Tajvanit. Në emisionin e sotëm, do t'ju flasim për kursin bazë të qeverisë kineze për zgjidhjen e problemit të Tajvanit, dhe do t'ju tregojmë se çfarë përpjekjesh ka bërë qeveria kineze për zgjidhjen e problemit të Tajvanit dhe për realizimin e ribashkimit shtetëror?

Të dashur dëgjues, po dëgjoni një fragment nga fjalimi, i mbajtur posaçërisht në mars të këtij nga kryetari i shtetit i Kinës Hu Jintao për zgjidhjen e problemit të Tajvanit. Në këtë fjalim ai tha se " ne përshëndesim përpjekjet që ka bërë çdo njeri, çdo parti politike e Tajvanit drejt parimit për një Kinë. Ne dëshirojmë të bisedojmë me ta lidhur me zhvillimin e marrëdhënieve midis dy brigjeve dhe nxitjen e ribashkimit paqësor, po të njihet parimi i një Kine, pavarësisht se çfarë kanë thënë dhe çfarë kanë bërë ata në të kaluarën".

Qysh nga shpallja, në vitin 1949, e Republikës Popullore të Kinës, qeveria kineze nuk heq dorë nga përpjekjet për ribashkimin e plotë shtetëror. Kursi bazë i qeverisë kineze për zgjidhjen e problemit të Tajvanit është "paqja e ribashkimi" dhe "një shtet me dy sisteme". Përmbajtja thelbësore e këtij kursi është realizimi i ribashkimit midis dy brigjeve nëpërmjet bisedimeve paqësore. Pas ribashkimit, korpusi kryesor i shtetit do të jetë pikërisht pjesa kontinentale e Kinës, që do të vazhdojë sistemin socialist, ndërsa Tajvani do të ruajë sistemin e tanishëm kapitalist.

Gjatë shumë vjetëve, qeveria kineze ka nxitur aktivisht zhvillimin e marrëdhënieve midis dy brigjeve. Me përpjekjet e përbashkëta të të dy brigjeve të ngushticës, në fund të viteve 80 të shekullit të kaluar, gjendja e shkëputjes 40 vjeçare midis dy brigjeve ndryshoi. Shkëmbimet ekonomike e kulturore dhe lidhjet e kontaktet e personave midis tyre kanë pasur një zhvillim të konsiderueshëm. Sipas të dhënave statistikore, gjatë më shumë se 10 vjetëve, vëllimi i tregtisë midis dy brigjeve arriti në mbi 400 miliardë dollarë amerikanë, ndër të cilët suficiti i palës së Tajvanit arriti në 300 miliardë dollarë amerikanë. Pala e pjesës kontinentale të Kinës u ka krijuar aktivisht kushte bashkatdhetarëve tajvanezë për vizita te të afërmit, për turizëm dhe për biznes në pjesën kontinentale të Kinës. Tani, 100 mijë banorë tajvanezë punojnë, mësojnë dhe banojnë në pjesën kontinentale të Kinës. Për të siguruar të drejtat dhe interesat e banorëve tajvanezë këtu, institucionet legjislative të Kinës dhe qeveria qendrore, si dhe administratat vendëse kanë hartuar një sërë ligjesh dhe rregulloresh dhe i kanë vënë këto në praktikë. Njëkohësisht, qeveria kineze ka bërë përpjekje edhe për nxitjen e zhvillimit të dialogut politik midis dy brigjeve.

Për kundër këtyre, pala tajvaneze ka krijuar shumë pengesa për vizitat e të afërmve, për ekskursionet dhe për udhëtimet e biznesit të banorëve të pjesës kontinentale të Kinës në Tajvan, duke penguar shkëmbimet e mëtejshme të bashkatdhetarëve midis dy brigjeve. Sidomos gjatë disa vjetëve të fundit, krahas humbjes së të drejtës për drejtim suprem të Partisë Guomidanase të Kinës në Tajvan, veprimet e forcave separatiste në Tajvan janë ashpërsuar pandërprerë. Autoritetet tajvaneze kanë zbatuar me forcë të madhe politikën për "pavarësinë e Tajvanit", që ka për qëllim shkëputjen e Tajvanit nga Kina dhe nuk pohojnë faktin, që Tajvani është një pjesë e Kinës, duke shkaktuar gjendjen e tensionit në marrëdhëniet midis dy brigjeve.