Me kalimin e kohëve, tenisi po konfirmohet si një nga sportet më spektakolar. Duke qenë se numri i tenistëve pretendentë në turne të rëndësishëm është rritur, ky sport të dhuron sfida shumë mbresëlënëse. Në turneun "Grand Slem" të U.S Open, motrat Uilliams, Serena dhe Venus, do të përballen me njëra-tjetrën në raundin e katërt. Motra e vogël, Serena, mundi italianen Françeska Skiavone me rezultatin 6-3, 6-4, ndërsa Venusi eliminoi sllovaken Daniela Hantuçova 6-3, 6-3. Për favoriten numër një për të fituar, rusen Maria Sharapova, duket se shorti është më i lehtë. Ajo do të përballet me Sania Mirzan, e cila u bë indiania e parë që arrin raundin e katërt e një turneu "Grand Slem". Ndërsa favoriti kryesor te meshkujt dhe numri një i botës, Roxher Federer, arriti një fitore të vështirë ndaj francezit Fabris Santoro. Zvicerani fitoi në tri sete 7-5, 7-5, 7-6, duke fituar falë qetësisë së tij në momentet më të rëndësishme të ndeshjes. 32-vjeçari Santoro, i cili është numri 76 në botë, është ndeshur edhe më parë me Federerin dhe e ka vënë në vështirësi. "Unë gjithmonë jam kënaqur kur jam ndeshur me të, - tha Federeri, i cili e mundi francezin në rrugën për të fituar titullin në sezonin e kaluar. - Ai më dha një mësim që herën e parë që u përballëm me njëri-tjetrin. Ishte një kënaqësi të luaje kundër, pasi është tepër gazmor gjatë ndeshjes." Ndeshjet midis motrave Uilliams gjithmonë kanë qenë zhgënjyese dhe pak dyshuese. Kur ato u përballën në finalen e Uimbëlldonit në vitin 2003, ndeshje të cilën e fitoi Serena, Venusi nuk luajti lojën e saj të zakonshme dhe dukej shumë e lodhur gjatë ndeshjes. Në përballjet e tyre me njëra-tjetrën, Serena kryeson 7-6 me fitore, gjithsesi Venusi fitoi në përballjen e tyre të fundit, në muajin maj. Kampionia në fuqi e Uimbëlldonit, Venusi, renditet dy vende më poshtë se motra e saj, duke qenë se është numri dhjetë në botë. Ajo është më në formë se motra e saj e vogël, e cila kohët e fundit ka pasur probleme me gjurin. "Unë mendoj se po luaj mirë. Gjuri im është përmirësuar shumë dhe shpresoj që edhe në ndeshjet në vazhdim, mos të kem probleme," - tha Serena. Ajo deklaroi gjithashtu se është pak e zhgënjyer për faktin që ndeshja ndaj motrës së saj do të bëhet kaq shpejt. Ndërsa Venusi duket gati dhe tha: "A jeni gati për një ndeshje spektakolare midis motrave Uilliams? Le ta shohim të dielën." ( Nga Sportishqiptar)