Gjatë lulëzimit të bazave të vjetra industriale të Kinës veri-lindore, ideja se ekonomia nuk mund të zhvillohet me shkatërrimin e burimeve të kufizuara po bëhet gradualisht një mendim i përbashkët i gjithënjë e më shumë kuadrove dhe banorëve të zonës së Kinës veri-lindore. Ekonomia qarkulluese ka treguar forcë të madhe jetëdhënëse në zhvillimin e këtyre bazave industriale, duke i nxitur ato të ecin në rrugën e mbrojtjes së mjedisit.

3 provincat e Kinës veri-lindore Liaonin, Jilin dhe Heilonjian janë quajtur "djep i industrisë së Kinës së re". Kur këto 3 provinca ishin forca lëvizëse në industrializimin e Kinës së re, u ndot seriozisht atmosfera, uji dhe mjedisi ekologjik i tyre. Gjatë zhvillimit të bazave të vjetra industriale, shumë ndërmarrje të zonës së Kinës veri-lindore kuptuan gradualisht dëmet e mëdha që sjell modeli tradicional i zhvillimit ekonomik "burimet ? produktet ? mbeturinat" dhe filluan të kalojnë në modelin e ri të zhvillimit të ekonomisë qarkulluese "burimet ? produktet ? burimet".

Disa vjet më parë, Shoqëria me përgjegjësi të kufizuar e alkoolit Huanzhun në Zhaodong të provincës Heilongjiang shkarkoi ujëra të papastra gjatë prodhimit dhe ndoti rëndë lumin Zhaolan, kështu ndërmarrja u detyrua të paguante një shumë jo të vogël si gjobë. Sot kjo ndërmarrje ka bërë përpjekje të mëdha për trajtimin e ujërave të papastra, pas filtrimit këto uëjra përdoren përsëri, kështu kjo ndërmarrje jo vetëm doli nga gjendja e vështirë e ndotjes së të tjerëve me ujëra të papastra, por ka prodhuar edhe ujë të pastër që mund të përdoret përsëri. Në këtë mënyrë ndërmarrja ka kursyer në vit 6 milionë tonë ujë dhe 100 mijë tonë qymyrgur, duke shtuar 9 milionë juanë fitime të tjera.

Shoqëria metalurgjike Tonghua e provincës Jilin, duke u nisur nga mendimi i ekonomisë qarkulluese "përdorimi minimal i burimeve, shfrytëzimi maksimal i tyre dhe pakësimi i mbeturinave", ka zgjedhur, përpunuar dhe shfrytëzuar mbeturinat me përmbajtje gize dhe i ka kthyer në prodhim në mënyrë qarkulluese, duke përfituar kështu 14 milionë juanë në vit. Drejtuesi i kësaj shoqërie i tha gazetarit se planifikimi i përgjithshëm i mundësive ekologjike dhe të mjedisit është kusht paraprak i zhvillimit të një ndërmarrjeje. Shfrytëzimi i mbeturinave industriale si një pikë e re e rritjes ekonomike do ta bëjë ndërmarrjen të zhvillohet në mënyrë të vazhdueshme.

Gjatë nxjerrjes së naftës del shumë ujë i ndotur, dhe pas nxjerrjes së naftës duhet bërë mbushja me ujë të pastër për të ruajtur presionin stratigrafik. Më se 10 vjet më parë, në fushën e naftës të Daçinit shkarkohej gjithmonë ujë i ndotur dhe blihej ujë i pastër për të bërë mbushjen. Sot këtu janë ndërtuar shumë fabrika për trajtimin e ujërave të papastra, të cilat futen përsëri nën tokë. Kështu janë kursyer burimet ujore, është evituar ndotja e mjedisit dhe janë kursyer shumë fonde. Daçinasit që kanë përfituar nga shfrytëzimi qarkullues i ujërave, e kanë drejtuar vëmendjen nga shfrytëzimi kompleks i burimeve petrokimike me vlerën më të madhe. Në këto rrethana është ngritur zona industriale ekologjike e Daçinit.

Sot, mbeturinat e qymyrit që konsideroheshin për një kohë të gjatë si barrë e rëndë ekologjike, janë bërë lëndë të para të pazëvendësueshme për zhvillimin e industrisë elektrike në qytetin e Fusinit. Në korrik, gazetari mësoi në këtë qytet se pas përurimit vitin e ardhshëm të punimeve të fazës së 2-të të termocentralit të mbeturinave të qymyrit në Fusin, do të konsumohen në vit 1 milion e 200 mijë tonë këto mbeturina. Edhe në qytete të tjera qymyrgurore të Kinës veri-lindore si Fushun, Shuanyashan, Qitaihe etj. po planifikohet për shfrytëzimi i këtyre mbeturinave, kështu që malet e pafunda të mbeturinave të qymyrit në këto qytete do të bëhen lëndë të para të çmueshme.

Tani mbi 600 ndërmarrje që shkarkojnë ndotje të madhe të provincës Liaonin kanë kaluar kontrollin higjienik dhe janë krijuar 20 ndërmarrje që nuk shkarkojnë ujë të papastër. Prodhimi i pastër është bërë diçka e pandalshme. Nga viti 2000 deri në vitin 2005, sasia mesatare vjetore e kursimit të energjisë në provincën e Liaoninit e kaloi shifrën 4%, u kursyen 250 milionë metra kub ujë, përqindja e ripërdorimit të ujit në degët industriale u ngrit në 88% nga 69% që ishte.

Nënkryetari i Komitetit Ekonomik të provincës Liaonin z. Yan Xi Huai tha se ekonomia qarkulluese është një rrugë e rëndësishme për vënien në zbatim të strategjisë së zhvillimit të vazhdueshëm dhe për realizimin e zhvillimit përpjesëtimor ekonomik, shoqëror dhe të mbrojtjes së mjedisit. Vetëm duke zbatuar masat e zhvillimit të ekonomisë qarkulluese dhe duke krijuar një gjendje të re të ekonomisë qarkulluese në degë të ndryshme industriale, do të mund të realizohet zhvillimi me ritme të shpejta i bazave të vjetra industriale.

Tani në 25 fabrika të provincës Liaonin për trajtimin e ujërave të papastra, përpunohen në ditë mbi 40 tonë ujëra të papastra, në 10 nga këto 25 fabrika është instaluar sistemi i përdorimit të këtyre ujërave të trajtuara, të cilat përdoren në industri, në ujitjen e pemëve dhe luleve etj. Në qytetin bregdetar Dalien është përsosur sistemi i grumbullimit të mbeturinave urbane.

Në qytetin Shenyan do të fillojnë punimet për ndërtimin e centralit të parë të prodhimit të energjisë me anë të mbeturinave me një vlerë 120 milionë juanë, i cili do të furnizojë 100 mijë familje të këtij qyteti me energji elekrike. Edhe qyteti Chanchun nuk ka mbetur prapa, kryetari i Bashkisë së këtij qytetit z.Gu Yejing u shpreh se bashkia do të vërë të gjitha focat për trajtimin e ujërave të përdorura, do të ndërtojë më shumë fabrika të trajtimit të mbeturinave etj.

Tani 3 provincat e Kinës veri-lindore po krijojnë sistemin e grumbullimit të materialeve të dala jashtë përdorimit dhe të mbeturinave, për të ngritur përqindjen e shfrytëzimit të burimeve të përtërira dhe për të nxitur zhvillimin harmonik ekonomiko-shoqëror. (Pina)