Para hapajes së kësaj konference, korrespondenti ynë vizitoi Akademinë Studimore të Gjoelogjisë dhe Paleontologjisë të Nankinit pranë Akademisë së Shkencave të Kinës. Kur hyra këtu, shkruan korrespondenti, m'u duk sikur kisha hyrë në periudhën e gjatë të kafshëve dhe bimëve të lashta gjeologjike. Në këtë oborr plot me gjelbërime, janë mbledhur dhe janë sistemuar 120 mijë fosile të kafshëve dhe bimëve të lashta. Më të hershmet prej tyre janë të periudhës para 2 miliardë vjetëve. Edhe fosilet e vendosura në dy anët e rrugës kanë një histori 200-300 milionë vjeçare.

Bashkëpunëtori shkencor dhe ndihmës-drejtori i kësaj akademie studimore, Vang Haifeng tha: "Në Kinë, që është një vend me territore shumë të gjera, ekzistojnë shtresa të ndryshme gjeologjike, që nga shtresa prepaleontologjike dhe deri në shtresën cenozoike. Grumbullimet në këto shtresa janë të plota, si në tokë ashtu edhe në det. Në këto shtresa gjeologjike të mbarë vendit tonë, ruhen të plota fosile shumë të pasura, të cilat formojnë një thesar për studimet paleontologjike dhe stratigrafike në gjithë botën. Përsa u përket zbulimit të shtresave gjeologjike dhe të kushteve të ruajtjes së fosileve, s' ka vende të vjeta në botë që mund të krahasohen me Kinën, përveç Kanadasë dhe Rusisë. "

Blloqet e fosileve në shumë shtresa gjeologjike të Kinës janë të vetmet në botë. Në vitin 1984, bashkëpunëtorët shkencorë Hou Xianguang dhe Zhang Ventang të Akademisë Studimore të Gjoelogjisë dhe Paleontologjisë të Nankinit zbuluan për herë të parë një bllok fosilesh të kafshëve të veçanta të lashta në zonën Maotianshan të distriktit Çeng-jiang të provincës Yunnan, të cilat u quajtën "Blloku i fosileve të kafshëve të Çeng-jiangut". Gjatë rreth 6 vjetëve pas asaj, ata së bashku me bashkëpunëtorët shkencorë Çen Jun-yuan, Sun Veiguo etj kanë qenë shumë herë në Çeng-jiang për studime dhe bënë koleksion sistematik të mijëra fosileve të çmueshme. Arritjet e tyre, pas publikimit, tronditën qarqet paleontologjike në botë. Publikimi i arritjeve të tyre u përfshi ndër lajmet më të rëndësishme në qarqet paleontologjike ndërkombëtare për vitin 1991, bile disa shkencëtarë e quajtën atë "zbulimin më të shkëlqyeshëm të fosileve në një shekull". Në këtë bllok fosilesh, ruhen fosile të kafshëve që jetuan para 530 milionë vjetëve. Ato janë ruajtur të plota, prandaj dallohen qartë edhe indet e kafshëve molluske të lashta, si zorrat, stomaku, goja dhe nervat e tyre. Shumë specialistë kinezë dhe të huaj janë të mendimit se ky bllok fosilesh të kafshëve të lashta, që janë ruajtur të plota dhe duken si të gjalla, është një nga dritaret në botë, nëpërmjet të cilave njohim larminë e jetës në periudhën e hershme paleontologjike, kur u bë "rrezatimi i madh i jetës".

Blloku i fosileve të periudhës cenozoike, të zbuluara në zonën Shanvang të distriktit Linqu të provincës Shandong, gjithashtu janë të rralla në botë.

Blloku i fosileve të kafshëve të lashta, të zbuluara në distriktin Ven-an të provincës Guizhou, mahniti botën. Profesori Çen Jun-yuan zbuloi këtu fosile të "insekteve të pranverës", të cilat janë fosilet më të hershme të kafshëve të zbuluara deri tani në botë. Me këtë zbulim, historia e kafshëve me dy anët simetrike u shty prapa 40 milionë vjet para periudhës kambriane. Ky zbulim vërtetoi gjithashtu se, qysh 40 milionë vjet para periudhës kambriane, ishin formuar "mjetet e trashëgimit " dhe sistemi i formimit të kafshëve me dy anët simetrike. Kjo vërtetoi gjithashtu se, qysh para "shpërthimit të jetës" para periudhës kambriane, jeta në Tokë kishte kaluar një proces të gjatë zhvillimi.

Studimet paleontologjike në Kinë filluan në vitet 20 të shekullit të 20-të. Akademia Studimore e Gjoelogjisë dhe Paleontologjisë e Nankinit pranë Akademisë së Shkencave të Kinës quhej në fillim Stacioni Studimor Paleontologjik pranë Institutit Studimor Gjeologjik të Akademisë Qendrore Kineze, që u formua në janar të vitit 1928. Në vitin 1951, pas shpalljes së Kinës së Re, u formua Instituti Studimor Paleontologjik pranë Akademisë së Shkencave të Kinës, ku u përqendruan një numër punonjësish të brezit veteran të stratigrafisë dhe paleontologjisë. Gjeologu dhe paleontologu i famshëm, profesor Li Siguang punoi si kryetari i parë i institutit. Pas 40 e ca vjet përpjekjesh, ky institut studimor është bërë një organ studimor i paleontologjisë dhe stratigrafisë me famë në arenën ndërkombëtare dhe konsiderohet si një nga tri qendrat e mëdha të studimeve paleontologjike në botë.

Vang Haifeng tha se punonjësit kinezë të shkencës paleontologjike kanë korrur arritje të mëdha. Ata kanë bërë anketa dhe studime në përmasë të madhe për shtresat gjeologjike dhe kafshët e lashta në rrafshnaltën Qinghai-Tibet, duke zbuluar enigmën e ngritjes së "Çatisë së botës", gjë që ka tërhequr vëmendjen e shkencëtarëve në botë.(Zheng)