Për shkak të organizimit të Lojërave Olimpike të vitit 2008, tani Pekini është bërë fokusi i mbarë botës. Për të garantuar sigurimin e Lojërave Olimpike, policia e Pekinit hartoi "Projektin e mbrojtjes së sigurisë" që projekton masat e sigurimit dhe studion problemet e ndryshme lidhur me sigurimin. Drejtori i policisë së Pekinit Ma Zhenchuan tha se policia e Pekinit do të parandalojë të gjitha rreziqet ndaj sigurisë së Lojërave Olimpike dhe do të krijojë në mbarë qytetin sistemin parandalues e kontrollues të sigurimit shoqëror për të goditur efektivisht krimet e ndryshme.

Gjatë punëve përgatitore për Lojërat Olimpike, Pekini ka fituar plotësisht përvojën e organizimit të Lojërave Olimpike duke kërkuar mënyrën e administrimit të sigurimit në përputhje me kërkesat e mbrojtjes së sigurisë së Lojërave Olimpike. Që sot e tutje, në aktivitetet e mëdha, policia e Pekinit do të zbatojë standardin e mbrojtjes së sigurisë së Lojërave Olimpike dhe do të përsosë gradualisht masat e ndryshme për të hedhur një bazë të mirë për sigurimin e Lojërave Olimpike.

Parashikohet se në vitin 2008, do të vijnë në Pekin më se 1 milion funksionarë qeveritarë, sportistë, biznesmenë, gazetarë, turistë nga vende të ndryshme. Krahas stadiumeve olimpike, ata do të vizitojnë edhe pika turistike, monumente të njohura historike, qendra tregtare, vende kulturore etj. të Pekinit. Prandaj rendi i mirë dhe i qëndrueshëm i sigurimit shoqëror të Pekinit ka rëndësi shumë të madhe.

Vitet e fundit, në fushën e sigurimit publik në botë janë shtuar dukshëm faktorët që ndikojnë në paqen dhe zhvillimin. Krimet e ndryshme kanë dëmtuar rendin politik e ekonomik ndërkombëtar dhe stabilitetin shoqëror ndaj vendeve të ndryshme kanë marrë masa të ndryshme për të goditur krimin. Prandaj policia e Pekinit do të zhvillojë aktivisht bashkëpunimin ndërkombëtar.

Policitë pjesëmarrëse në simpoziumin e shkëmbimeve dhe bashkëpunimit në çështjet policore midis ASEAN-it dhe Kinës, Japonisë e Republikës së Koresë janë të mendimit se përgatitja e plotë dhe bashkëpunimi me vende të tjera kanë rëndësi të madhe për organizimin me sukses të Lojërave Olimpike të Pekinit.

Policia e Tokios së Japonisë propozoi që gjatë zhvillimit të Lojërave Olimpike, Pekini duhet të krijojë një mjedis të bukur për shikuesit dhe turistët e njëkohësisht duhet të garantojë stabilitetin shoqëror dhe rendin e mirë publik.

Policia e Seulit të Republikës së Koresë është e mendimit se Pekini duhet të hartojë planin e përgjithshëm të sigurimit dhe duhet të grumbullojë përvojë nëpërmjet ushtrimeve dhe përgatitjeve të pandërprera. (Fani)