Na ishte një plak rreth të 90-tave, që e quanin Yu Gong. Para portës së shtëpisë së tij, gjendeshin dy male të larta: mali Taihang dhe mali Vangvu, të cilat pengonin hyrjen dhe daljen e tyre. Një ditë, Yu Gong mblodhi gjithë familjen dhe i tha: "Këto dy male na pengojnë rrugën. Me forcën e familjes sonë, mund të lëvizim ato në një vend tjetër. "

Bijtë dhe nipërit e tij thanë: "Shumë mirë. Le të fillojmë që nga dita e nesërme." Mirëpo plaka e tij u shpreh kundër, sepse ishte e mendimit se kjo ishte një punë tepër e vështirë. Ajo tha: "Ne kemi shumë vjet që jetojmë këtu, por pse të mos vazhdojmë këtu? Dy malet janë kaq të mëdha. Edhe sikur të mund të lëvizim ato, ku do të lëmë dheun e tyre?"

Fjalët e plakës ngjallën menjëherë diskutime të zjarrta. Ishte me të vërtetë një problem se ku të çonin gurët dhe dheun e dy maleve? Pas diskutimeve, ata vendosën njëzëri që të transportonin gurët dhe dheun e atyre maleve në det që nuk ishin shumë larg.

Të nesërmen, plaku Yu Gong, në krye të gjithë familjes së tij, filluan punën për të lëvizur malet gjetkë. Ata ishin komshinj me një vejushë, e cila kishte një djalë 7 a 8 vjeçar. Me të dëgjuar se do të lëvizeshin dy malet, ajo u gëzua shumë dhe erdhi për të ndihmuar.

Përveç veglave të thjeshta si lopata dhe kofinë, ata nuk kishin vegla të tjera, por kishin detyrën e rëndë për të transportuar gurët dhe dheun në det. Për këtë arsye, pas një muj të punës së tyre të lodhshme, malet nuk dukeshin aspak të zvogëluar.

Një plak me emrin Zhi Sou qeshi, duke parë përpjkjet e familjes së plakut Yu Gong. Një ditë, ai erdhi tek Yu Gong dhe tha: "Shiko, ti je kaq i moshuar dhe mezi ecën. Si mund të lëvizni këto dy male gjetiu? "

Yu Gong iu përgjigj: "Ti nuk më dukesh më i zgjuar se një djalë i vogël, megjithëse emri yt ka kuptimin Plaku i Zgjuar. Është e vërtetë se unë nuk do të rroj shumë vjet, por do të vazhdojnë punën bijtë e mi, pasi vdes unë. Pas vdekjes së bijve të mi, do të vazhdojnë bijtë e tyre. Kjo punë do të trashëgohet brez pas brezi. Vazhdimësia e brezave nuk ka fund, por gurët e maleve do të pakësohen aq, sa të heqen gjetiu dhe nuk do të dalin më balta të reja ose gurë të rinj. Pse nuk mund të lëvizim këto male gjetiu, përderisa të punojmë ditë për ditë, muaj për muaj dhe vit për vit? " Pasi dëgjoi këto fjalë, plaku Zhi Sou heshti.

Plaku Yu Gong, në krye të pjesëtarëve të familjes së tij, punonte pandërprerë për të lëvizur malet. Ata punonin edhe në verë me vapë, edhe në dimër të ftohtë, dhe punonin që nga mëngjesi herët deri natën vonë. Më në fund, perëndia u prek nga veprimi i plakut Yu Gong dhe dërgoi dy shenjtër në botën njerëzore, të cilët i morën ato dy male në një vend tjetër.(Zheng)