Studentët kinezë që kanë studiuar jashtë vendit, e kanë filluar veprimtarinë patriotike kundër pushtuesve japonezë para " ngjarjes së 7 korrikut të vitit 1937". Pas " ngjarjes së 18 shtatorit të vitit 1931, mbi 2000 studentë kinezë u kthyen nga Japonia dhe filluan veprimtarinë kundër pushtuesve japonezë për shpëtimin e vendit..

Studentët kinezë që gjendeshin për studime në Japoni, iu përgjigjën aktivisht thirrjes së qeverisë që " të kthehen nga Japonia dhe të marrin pjesë në luftën kundër pushtuesve japonezë. Brenda vetëm dy muajve nga korriku deri në shtator të vitit 1937, u kthyen nga Japonia mbi 4 mijë studentë kinezë. Krahas këtyre, edhe studentët kinezë që ndodheshin për studime në vendet evropiane dhe të Amerikës u kthyen njëri pas tjetrit në atdhe për të marrë pjesë në luftën kundër pushtuesve japonezë, duke formuar valën e dytë të madhe të kthimit të studentëve në atdhe pas Revolucionit të vitit 1911.

Studentët kinezë që kanë studiuar jashtë vendit, u bënë forca kryesore për propagandimin e luftës së popullit kinez kundër pushtuesve japonezë.

Në gusht të vitit 1937, qindra studentë të Shangait që ishin kthyer nga Japonia, krijuan grupe të propagandës, trupa artistike, botuan gazeta ose shkruan artikuj, për të demaskuar ambiciet e pushtuesve japonezë dhe për të mobilizuar masat popullore në luftën e rezistencës.

Shumë studentë kinezë që ishin kthyer nga jashtë, shkuan edhe në bazat mbështetëse të luftës kundër pushtuesve japonezë. Doktori Chen Kanbai që ishte kthyer nga Gjermania, shkoi në bazën mbështetëse Jen An dhe u ngarkua me detyrën e nënkryetarit të Akademisë së Shkencave Natyrore të Jen Anit. Shumë studentë kinezë që kishin studiuar jashtë vendit, shkuan në këto baza mbështetëse të luftës, duke marrë me vete edhe teknologjitë e prodhimit të minave dhe të armëve të tjera.

Kthimi i këtyre studentëve kinezë ka sjellë edhe gjak të ri për arsimin e lartë të Kinës gjatë viteve të luftës. P.sh, 87% e profesorëve të Universitetit të Kinës jug-perëndimore ishin studentë kinezë që ishin kthyer në vitin 1941. Dekanët e 26 fakulteteve të këtij universiteti, përveç fakultetit të letërsisë kineze, ishin të gjithë studentë që ishin kthyer nga jashtë.

Përleshja në luftën kundër pushtuesve japonezë ishte jo vetëm përleshje armësh, por edhe e shkencës dhe teknologjisë. Studentët kinezë që ishin kthyer në atdhe, ishin forca kryesore për nxitjen e progresit tekniko-shkencor të Kinës. Studenti Gjyn Cutong që ishte kthyer nga Gjermania, prodhoi në vitin 1938 teleskopin e parë ushtarak të Kinës. Për të zgjidhur mungesën e benzinës, studenti Xhao Xhon Ou që ishte kthyer nga Gjermania në vitin 1939, projektoi dhe ndërtoi fabrikën e nënprodukteve petrokimike.

Numri i studentëve kinezë që u kthyen në atdhe gjatë luftës kundër pushtuesve japonezë, nuk ishte i madh, por kudo shiheshin gjurmët e tyre, si në bazat mbështetëse të luftës, ashtu edhe në frontin e parë të luftës, si në qarqet politike dhe ushtarake, ashtu edhe në qarqet arsimore, tekniko-shkencore. Ata kanë shkruar një faqe të ndritur dhe prekëse në luftën e popullit kinez kundër pushtuesve japonezë. ( zhang )