Ditët e fundit, gazetari mësoi nga sektorët përkatës të provincës Qinghai të Kinës veri-perëndimore se gjatë 5 vjetëve të fundit, nëpërmjet një sërë masash të mbrojtjes ekologjike, mjedisi ekologjik i zonës së burimit të 3 lumenjve kryesorë të Kinës është përmirësuar më tej. Tani, Kina po forcon më tej mbrojtjen e mjedisit ekologjik të kësaj zone.

Zona e burimit të 3 lumenjve është pikërisht vendburimi i lumit Jance, i lumit të Verdhë dhe i lumit Lancang të Kinës. Kjo zonë ndodhet në pjesën jug-perëndimore të provincës Qinghai të rrafshnaltës Qinghai-Tibet. Për shkak të pozitës së posaçme gjeografike dhe të kushteve të veçanta natyrore, në këtë zonë ka sipërfaqe të mëdha të lagunave, stepave, pyjeve dhe të burimeve të pasura të kafshëve e të bimëve të egra. Por para disa vjetëve, krahas ngritjes së temperaturës së klimës në gjithë globin dhe krahas shtimit të aktiviteteve njerëzore në këtë zonë, mjedisi ekologjik i vendburimit të 3 lumenjve është keqësuar pandërprerë, sipërfaqe të mëdha të kullotave janë mbuluar me rërë dhe sistemi ekologjik i bimëve dhe lagunave është shkatërruar rëndë.

Keqësimi i mëtejshëm ekologjik ka shkaktuar uljen e shpejtë të burimeve ujore të zonës së burimit të 3 lumenjve, duke kërcënuar drejtpërdrejt sigurinë ekologjike të lumit Jance, të lumit të Verdhë dhe të lumit Lancang. Për të mbrojtur në mënyrë efikase mjedisin ekologjik të vendburimit të 3 lumenjve, para 5 vjetëve, Kina ka krijuar këtu zonën e mbrojtjes natyrore dhe ka marrë një sërë masash të forta për të përmirësuar mjedisin ekologjik vendës.

Në këtë zonë të mbrojtjes natyrore janë zbatuar disa vepra të mbrojtjes ekologjike, të cilat janë: vepra e mbrojtjes së pyjeve natyrore, vepra e kthimit të tokave të punueshme në pyje dhe në gjelbërime. Përveç këtyre, Kina ka marrë edhe disa masa të tjera për mbrojtjen e mjedisit ekologjik në këtë zonë.

Deri tani në zonën e burimit të 3 lumenjve u sistemua erozioni me një përfaqe prej 50 hektarësh, kafshë të shumëllojshme të egra janë kthyer përsëri dhe numri i këtyre kafshëve është shtuar në mënyrë të dukshme.

Për të forcuar mbrojtjen e mjedisit ekologjik të kësaj zone, në fillim të këtij viti, Këshilli i Shtetit i Kinës miratoi "planifikimin e përgjithshëm të mbrojtjes dhe ndërtimit ekologjik të zonës së mbrojtjes natyrore të vendburimit të 3 lumenjve të Qinghait" dhe do të investojë 7 miliardë e 500 milionë juanë për 7 vjet me radhë në përmirësimin e mëtejshëm të mjedisit ekologjik të kësaj zone. (Sihai)