Porti Nantong që është një port kontinental në provincën Jiangsu të Kinës jug-lindore, është vetëm 100 kilometra larg nga lindja e detit dhe është porti i parë lumor që hyn në lumin Jance nga deti. Kjo epërsi gjeografike e bën portin Nantong të lidhet si me kontinentin e gjerë, ashtu edhe me hapësirën e gjerë detare. Me zbatimin e politikës së hapjes, porti Nantong do të luajë një rol gjithnjë e më të rëndësishëm.

Porti Nantong që u ndërtua në vitin 1904, është porti i parë që hyn në lumin Jance nga deti Huanghai. Ai ka një pozitë relativisht të mirë gjeografike. Hapësira ujore e portit është e gjerë. Dallgët janë të vogla. Linja kryesore me thellësi 10 metrash është 1,5 kilometra e gjerë, kurse linja me thellësi 5 metrash është më e gjerë. Përveç këtyre, zona e brendshme e portit Nantong është e gjerë dhe mund të lidhet me 6 provinca dhe një qytet në rrjedhjen e sipërme të lumit Jance dhe rrjeti i lumenjve të brendshëm është i lidhur me të katër anët, gjë që u sjell lehtësi shumë të madhe transportit dhe shpërndarjes. Prandaj porti Nantong është pikë e vërtetë e lidhjes së lumenjve me detin dhe është nyja për zhvillimin e transportit lumor dhe detar. Tani, në të gjithë portin ka më se 5 mijë punëtorë, ka 13 skela, prej të cilave 4 janë skela 10 mijë tonëshe dhe në to mund të qëndrojnë anije 3 mijë tonëshe. Sasia e shkarkim-ngarkimit të këtij porti ka hyrë në radhën e parë të porteve të mëdha të Kinës.

Në port kudo vihet re një tablo e zënë. Materialet e ndryshme të import-eksportit grumbullohen si male. Kontejnerët me standardin ndërkombëtar radhiten në mënyrë të rregullt. Makinat e ngarkuara plot me mallra shkojnë dhe vijnë pandërprerë. Shumë vinça ngrejnë dhe ulin mallra.

Në portin Nantong skela më me veçori është skela mbiujore që ndodhet në qendër të lumit. Porti Nantong si një port lumor shërben vetëm 40% të sasisë së shkarkim-ngarkimit për transportin vendas, kurse 60% të sasisë së shkarkim-ngarkimit shërben për transportin ndërmjetës. Prej tyre transporti ndërmjetës mbiujor zë një pjesë të madhe. (Sihai)