Është e tepruar të flitet për hakmarrje, as sportive. Por Milani kundër Juventusit, ka marrë mbrëmë, një revansh sa do të vogël në trofeun "Berluskoni", duke fituar 2-1 në fund të një ndeshjeje të vërtetë, të rëndë, luftarake, pa dyshim dhe spektakolare. Në fillim ka shënuar Vieira, por në pjesën e dytë, përmbysja e Milanit ka pasur "markën" braziliane. Në fillim ka barazuar Kaka, pastaj Serzhinjo ka mbyllur llogaritë me "armiqtë" historikë. Kuqezinjtë fitojnë kështu edicionin e 15-të të këtij trofeu dhe mbrëmë ishte trofeu i 6-të që u vesh kuqezi.

Juventusi kthehej në "San Siro", pasi në vizitën e fundit, më 8 maj të këtij viti, "hipotekoi" titullin e 28-të kampion. Dhe mbrëmë fillimi i ndeshjes ka qenë i gjithi i "markës bardhezi. "Zonja" është prezantuar ndaj "Djallit" me veshjen më prestigjioze, në kërkim të një tjetër sezoni të pasur me kënaqësi. Emerson dhe Vieira janë "zotërinjtë" e mesfushës dhe ka qenë pikërisht francezi, ai që ka zhbllokuar rezultatin. Goli i Juventusit vjen nga një pasim i Zebinasë me të majtën, i cili "peshkon" Vieiranë. Francezi futet në mes të mbrojtjes kuqezi dhe shënon përballë Didës. Pas mbylljes së pjesës së parë, Milani reflekton dhe barazon në minutën e 53-të me Kakanë. Ka qenë një aksion i shkëlqyer Sedorf-Sheva-Kaka. Pas një krosimi nga e djathta e ukrainasit, braziliani ka barazuar shifrat.

Goli i dytë i Milanit, ka ardhur nga një krosim i saktë i Rui Kostës për Serzhinjon: ky i fundit ka lënë pas me sprintin e tij Pesoton dhe me një goditje të bukur ka mposhtur Kimentin. Megjithatë ka qenë një test i mirë për të dy trajnerët, që kanë provuar thuajse të gjithë lojtarët e grumbulluar në këtë miqësore.

Nedved dhe Bufon, dëmtimet e papritura

Probleme në shtëpinë e Juventusit pas ndeshjes së mbrëmshme për trofeun "Berluskoni" kundër Milanit në "San Siro". Gjatë ndeshjes, dolën nga fusha për një dëmtim, në fillim Nedvedi, pastaj Bufoni. Çeku u zëvendësua gjatë pjesës së parë për një ndërhyrje të gabuar nga Maldini në kavilje, nsërsa portieri bardhezi, që tani rrezikon të mungojë edhe me kombëtaren italiane në miqësoren në Irlandë, doli nga fusha me barrelë pas një dyluftimi me Kakanë. Për të ka shumë mundësi, që të jetë dëmtuar shpatullëm.