Pekini është qendra politike, kulturore, e shkëmbimeve ndërkombëtare e Kinës dhe ka një histori të gjatë e shumë monumente të njohura historike. Për shkak të burimeve të pasura turistike, çdo vit shumë turistë vendës dhe të huaj vijnë në Pekin për vizitë. Sipas statistikave, në vitin 2004, Pekini priti më shumë se 3 milionë turistë të huaj dhe 100 milionë turistë vendës ndërsa të ardhurat turistike arritën në 130 miliardë juanë.

Zhvillimi në Pekin i Lojërave Olimpike të vitit 2008 është një rast historik për zhvillimin e turizmit të Pekinit. Zonja Xiong Yumei tha:

"Drejtoria e Turizmit e Pekinit parashikon se nga viti 2005 deri në vitin 2007, turistët e huaj që do të vizitojnë Pekinin do të rriten çdo vit 7 deri 8%, kurse në vitin 2008 kjo rritje do të arrijë në 13%. Kështu në vitin 2008, Pekini do të presë 4.4 milionë turistë të huaj dhe 150 milionë turistë vendës."

Xiong Yumei tha se për të shfrytëzuar mundësitë e mëdha tregtare që vijnë nga zhvillimi i Lojërave Olimpike në Pekin dhe për të krijuar një mjedis të mirë turistik për turistët, Pekini po përmirëson problemet ekzistuese në sektorin turistik. Ajo tha se në krahasim me të kaluarën, turizmi i Pekinit ka pasur progres të madh, por në krahasim me qytetet e zhvilluara turistike në botë, ka edhe disa probleme për shembull mungojnë hotelet me yje, duhet të përmirësohet më tej mjedisi turistik, duhet të forcohen shërbimet e informacioneve turistike etj.

Lidhur me këtë, Xiong Yumei vuri në dukje se gjatë 3 vjetëve deri në vitin 2008, Pekini do të forcojë ndërtimin e infrastrukturës turistike duke u përpjekur të ngrejë nivelin e shërbimeve turistike. Ajo tha:

"Pekini do të forcojë ndërtimin e hoteleve dhe të pikave turistike. Tani në Pekin ka 630 hotele me yje, kur të zhvillohen Lojërat Olimpike në vitin 2008, kjo shifër do të shtohet në 800. Ne do ta arrijmë këtë objektiv nëpërmjet ndërtimit të hoteleve të reja, rindërtimit të hoteleve të tanishme, përmirësimit të pajisjeve të hoteleve etj."

Për të përmirësuar mjedisin e pikave turistike, në gjashtëmujorin e parë të këtij viti, Pekini investoi më shumë se 50 milionë juanë në ndërtimin e rrugëve, sistemimin e mjedisit, mbrojtjen ekologjike etj. Njëkohësisht, Pekini ka rindërtuar restorante, depo dhe pajisje të tjera në pikat turistike.

Krahas këtyre, Pekini po bën përpjekje për të ngritur nivelin e shërbimeve turistike. Bëhet e ditur se Pekini do të ndërtojë qendrën e informacioneve turistike për t'u dhënë turistëve shërbime në banim, ushqime, blerjen e mallrave, transport etj. Drejtoria e Turizmit e Pekinit do të përgatisë edhe shumë punonjës për sektorin turistik brenda 3 vjetëve dhe do të rritë kryesisht aftësinë e tyre shërbyese dhe nivelin e zotërimit të gjuhëve të huaja. (Fani)