dëgjoni

Nga viti 2000 deri në vitin 2001 Kina zbatoi projektin për mbrojtjen e pyjeve natyrore dhe projektin për mbrojtjen e bimëve dhe të kafshëve të egra. Kjo është një masë e rëndësishme strategjike për zhvillimin e vazhdueshëm të vendit dhe për realizimin e bashkëjetesës harmonike midis njeriut dhe natyrës. Gjatë kësaj periudhe, ashtu si zona të tjera pyjore në mbarë vendin, edhe zona pyjore Shenlonka në provincën Hupej të Kinës, e ka përballuar këtë sfidë dhe ka gjetur një rrugë për zhvillimin e ekonomisë ekologjike. Gjatë 5 vjetëve të fundit, të ardhurat financiare dhe të ardhurat mesatare neto të fshatarëve të zonës pyjore Shenlonka u radhitën në krye të të gjithë provincës. Zona pyjore Shenlonka ka qenë një zonë e varfër që mbështetej vetëm te burimet natyrore. Me gjithë zhvillimin ekonomik, mjedisi ekologjik në këtë zonë pyjore nuk është dëmtuar, por përkundrazi sipërfaqja e pyllëzuar është shtuar nga viti në vit.

I moshuar Mei Deshen që ka punuar për 30 vjet me radhë në këtë zonë pyjore, ka qenë një punëtor për prerjen e drurit, kurse sot punon si roje pyjesh, sepse që në vitin 2000 filloi të vihet në zbatim projekti për mbrojtjen e pyjeve natyrorë dhe është ndaluar prerja e drurëve. Pas disa vjet përpjekjesh janë arritur rezultate të dukshme, përqindja e pyllëzimit është ngritur në 87,8%.

I moshuari Mej tha; Pranë zonës pyjore kalon lumi Ven Shui. Më parë, për shkak të mungesës së ujit, ndërpritej shpesh rrjedha e ujit të këtij lumi, kurse tani në të katër stinët ky lumë ka plot ujë të kulluar dhe sasia e ujit të lumit është shtuar nga viti në vit.

Përqindja e pyllëzimit është ngritur, efektiviteti ekologjik është rritur, dhe nuk lejohet prerja e drurëve. Atëherë me se merren tani punëtorët e zonës pyjore?

Zona pyjore Shenlonka, si një bazë e lëndës së parë drusore në provincën Hupej të Kinës, është zhvilluar gjatë hapjes së rrugëve pyjore. Kjo zonë ka epërsi në gjelbërim dhe dallohet për ajrin e pastër dhe për bimët e kafshët e egra të rralla. Për zhvillimin e saj të mëtejshëm zona pyjore Shenlonka duhet ta shndërrojë industrinë pyjore në një industri të gjelbër, industri turistike dhe në një industri të shumëllojshme. Në programin e zhvillimit janë përfshirë elemente të ndërtimit ekologjik, të turizmit ekologjik, të bujqësisë ekologjike, të industrisë ekologjike dhe të ndërtimit urbanistik ekologjik.

" Të ngremë lart flamurin e ekologjisë, të zhvillojmë turizmin ekologjik dhe të pasurohemi nga gjelbërimi" tha sekretari i komitetit të partisë për zonën pyjore Shenlonka, Tan Hui.

Deri më sot, në këtë zonë pyjore janë hapur 5 rajone turistike, janë ndërtuar afro 100 hotele dhe çdo vit priten afro 500 mijë turistë. Në vitin 2004 të ardhurat nga turizmi kanë arritur në 150 milionë juanë. Fshatarët e larguar janë shpërngulur në qyteza, ose në qendrat e banimit përgjatë rrugëve automobilistike. Ndër 81 fshatra administrativë 35 prej tyre janë shndërruar në fshatra ekologjike dhe është krijuar një strukturë e bujqësisë ekologjike, janë hapur 9 mijë hektarë parcela të cilësisë së lartë, nga të cilat janë shtuar 200 milionë juanë të ardhura.

Në vitin 1999, para zbatimit të projektit për mbrojtjen e pyjeve natyrore, të ardhurat financiare të të gjithë zonës pyjore ishin 23 milionë juanë dhe 80% të tyre kanë ardhur nga lënda e parë drusore. Kurse në vitin 2004 pa prerjen e asnjë druri të ardhurat financiare të kësaj zone arritën në 63 milionë juanë, duke u shtuar afro 42 milionë juanë në krahasim me vitin 1999. ( zhang )