Goli i parë për miqtë u shënua nga Djibril Sise në minutën e 25-të të pjesës së parë. Gjashtë minuta më pas spanjolli Fernando Morientes shënoi golin e dytë për ekipin e Liverpulit. Ky ishte goli i parë për spanjollin në Champions me fanellën e Liverpulit. Në sezonin e kaluar, Morientesi nuk mundi të aktivizohej në Ligën e Kampioneve me ekipin e Liverpulit, për shkak se kishte luajtur në fazën eliminatore me ekipin e Realit të Madridit. Pas pësimit të golit të dytë, bullgarët arritën të përgjigjeshin duke shkurtuar diferencën e golave me anë të sulmuesit Dimitrov. Pjesa e parë u mbyll me rezultatin 2-1, në favor të ekipit anglez.

Në pjesën e dytë, Liverpuli ushtroi një presion të vazhdueshëm mbi ekipin bullgar, i cili nuk e rrezikoi asnjëherë seriozisht portën e Dudekut. Morientes arriti të shënonte golin e tij të dytë në minutën e 60-të, duke vulosur rezultatin përfundimtar 1-3.

Në takimet e tjera, Interi arriti një fitore të pastër 2-0 në fushën e ekipit të Shaktar Donetskut. Golat për ekipin e drejtuar nga trajneri Mançini, u shënuan në pjesën e dytë të takimit.

Në minutën e 68-të, nigeriani Martins shënoi golin e parë për Interin dhe 10 minuta më pas, braziliani Adriano vulosi gjithçka në 2-0. Në ndeshjen e kthimit, trajneri Mançini do t'a ketë më të lehtë kualifikimin, pasi do të ketë avantzhin e dy golave të shënuar në fushën kundërshtare. (Nga Sportishqiptar)