Kina ka filluar kërkimet shkencore që nga vitet 80 të shekullit të kaluar. Në fillim këto kërkime përqëndroheshin në Antarktidë. Por vitet e fundit, krahas kërkimeve shkencore në Artarktidë, Poli i Veriut është bërë një aspekt i ri i kërkimeve gjeologjike të Kinës. Në emisionin e sotëm do t'ju flasim kryesisht për kërkimet shkencore të Kinës në Polin e Veriut.

Para viteve 90 të shekullit të kaluar, për shkak të luftës së ftohtë, Kina që nuk është vend përreth Polit të Veriut, e kishte të vështirë të zhvillonte kërkime shkencore në rajonin e Polit të Veriut. Vetëm pas luftës së ftohtë Kina e filloi gradualisht këtë veprimtari. Shefi i Zyrës së ekspeditës polare pranë Drejtorisë Shtetërore Oqeanike të Kinës, zoti Qy Tanyu tha se kërkimet shkencore në Polin e Veriut kanë rëndësi të madhe.

Çfarë ndikimi ushtron ndryshimi i rajonit të Polit të Veriut, si një rajon i ftohtë, mbi aktivitetet e njerëzimit dhe çfarë ndikimi ushtrojnë aktivitetet e njerëzimit mbi këtë rajon ? Këto janë probleme që meritojnë vëmendjen e përgjithshme të mbarë botës. Kina, si një vend i madh në hemisferën Veriore, ndikohet drejtpërsëdrejti nga ndryshimet klimaterike në Polin e Veriut. Prandaj, Kina u kushton vëmendje të madhe ndryshimeve klimaterike në këtë rajon.

Në vitin 1999 dhe në vitin 2003 Kina ka zhvilluar dy herë kërkime shkencore në Polin e Veriut. Duke u mbështetur tek anija e ekspeditës shkencore " Xylong" të Kinës, si platformë, shkencëtarët kinezë kanë bërë kërkime të ndryshme gjeologjike në ujërat e Oqeanit të ngrirë të Veriut, si kërkime oqeanike, të akullit dhe të dëborës, kërkime atmosferike, biologjike, etj dhe kanë fituar shumë të dhëna e modele të vlefshme.

Për të zhvilluar më tej studimet polare, në vitin 2004 Kina krijoi për herë të parë në rrethin e Polit të Veriut një stacion të ekspeditës shkencore. Zoti Li Chunxian që ka marrë pjesë në ngritjen e këtij stacioni, tha:

Në vitin 2004 Kina ngriti në rajonin Spicbergen të Norvegjisë stacionin e kërkimeve shkencore, duke hedhur një bazë të fortë për zhvillimin afatgjatë të ekspeditës në Polin e Veriut.

Krijimi i këtij stacioni shënoi një përparim të madh në kërkimet shkencore në Polin e Veriut. Brenda një viti pas krijimit të këtij stacioni mbi 10 shkencëtarë kinezë kanë punuar në këtë stacion.

Për të zhvilluar më tej kërkimet shkencore në Polin e Veriut, Kina do të përmirësojë në të ardhmen kushtet e punës në stacionin e kërkimeve shkencore dhe do të shtojë më shumë aparatura e pajisje të domosdoshme. Njëkohësisht do të forcojë edhe bashkëpunimin ndërkombëtar në këtë drejtim, për të ngritur nivelin e kërkimeve tona shkencore. ( zhang )