Në ndeshjet e kërcimit nga trampolina të Kampionatit botëror të notit për vitin 2005 të zhvilluar pak kohë më parë në Montreal, ekipi kinez fitoi 5 medalje të arta duke zënë vendin e parë në tabelën e medaljeve të arta. Sipas këtij rezultati, ekipi kinez i kërcimit nga trampolina që quhet "ekip ëndërr" zë vazhdimisht vendin e parë në botë, por kapitenia e ekipit kinez Zhou Jihong vuri në dukje se në këtë kampionat, ekipi kinez hasi sfida të mëdha.

Në këtë kampionat, ekipi kinez i kërcimit nga trampolina dërgoi disa lojtarë të vjetër edhe disa lojtarë të rinj me qëllim që të ngrihet niveli i lojtarëve të rinj. Por lojtarët e rinj nuk u paraqitën shumë mirë, në garën e trampolinës 3 metra për meshkuj, He Cong fitoi vetëm medaljen e bronztë, kurse në garën e platformës 10 metra për meshkuj, Yang Jinghui zuri vetëm në vendin e 7-të. Zhou Jihong vuri në dukje se ky rezultat nuk do të thotë që u ul niveli i lojtarëve të rinj kinezë, por duhet thenë se konkurrenca është bërë më e ashpër. Ajo tha:

"Këtë herë ne dërguam disa lojtarë të rinj në kampionatin e notit për t'u parapërgatitur për Lojërat Olimpike të Pekinit që do të zhvillohen në vitin 2008. Sipas gjendjes së tanishme, përgatitja e një lojtari të ri të shquar është më e vështirë se e kaluara, sepse tani niveli botëror është ngritur shumë shpejt."

Zhou Jihong tha gjithashtu se përshtypja më e thellë e saj për këtë kampionat është që tani vendet e ndryshme u kushtojnë rëndësi më të madhe garave të kërcimit nga trampolina. Sipas përvojës së saj, në të kaluarën, lojtarët e vendeve të tjera nuk i kushtonin rëndësi kampionatit botëror të notit që zhvillohet vitin e parë pas zhvillimit të Lojërave Olimpike, por këtë herë niveli i lojtarëve nuk është më i ulët se Lojërat Olimpike.

Në këtë kampionat, vendet e ndryshme me nivel të lartë të kërcimit nga trampolina me ekipin kanadez në krye zhvilluan konkurrencë të ashpër me ekipin kinez. Ekipi kanadez fitoi 3 medalje të arta, ndër të cilat lojtari 20-vjeçar Aleksander Despatie fitoi dy medalje të arta në garën e trampolinës 1 metër për meshkuj dhe të trampolinës 3 metra për meshkuj. Ai konsiderohet një gjeni dhe do të jetë kundërshtari Nr.1 i ekipit kinez në Lojërat Olimpike të Pekinit.

Krahas ekipit kanadez, edhe në ekipin australian, ekipin rus, ekipin amerikan, ekipin meksikan, ekipin kubanez ka shumë lojtarë të shquar që do ta kërcënojnë pozitën e ekipit kinez në fushën e kërcimit nga trampolina.

Edhe rishikimi i rregullave të kërcimit nga trampolina ka ushtruar ndikim ndaj ekipit kinez. Sipas rregullave të reja, në garat e ardhme të kërcimit nga trampolina nuk do të zhvillohen më gara në numra të caktuar. Për shkak se lojtarët kinezë kanë epërsi në garat e numrave të caktuar, kjo masë do të ulë epërsinë e ekipit kinez.

Për të përballuar këtë sfidë, Zhou Jihong tha se ekipi kinez do të ngrejë më tej nivelin e vet. Ajo tha:

"Do të ngrejmë më tej përgatitjen psikologjike të lojtarëve dhe do të ngrejmë vazhdimisht nivelin e tyre teknik." (Fani)