Liverpuli do të ndeshet me Sidnein dhe skuadrën e Kosta Rikës, Deportivo Sapriza, në kampionatin botëror të klubeve që do të zhvillohet sivjet për herë të parë në Tokio. Në këtë veprimtari do të marrin pjesë gjashtë klube, fitueset e Kupës së Kampioneve në çdo kontinent. Skuadrat do të jenë të ndara në dy grupe dhe, përveç grupit të parë, ku bëjnë pjesë kampionët e Evropës, do të ketë edhe një grup tjetër me tri skuadra, ku do të bëjnë pjesë San Paolo, fituesi i Kupës Libertadores dhe kampionët për klube në Azi dhe Afrikë, të cilët do të përcaktohen në muajin nëntor. Kampionati botëror i klubeve zëvendëson veprimtarinë, që deri një vit më parë quhej Kupa Interkontinentale, dhe përballeshin në një ndeshje të vetme kampionët e Europës me kampionët e Amerikës Latine. Teorikisht grupet do të kenë një ndarje ndryshe nga ajo e zakonshmja, pasi Sidnei dhe Deportivo Sapriza do të ndeshen me njëra-tjetrën në takimin hapës të kësaj veprimtarie më 12 dhjetor, dhe skuadra fituese do të ketë të drejtë të luajë me Livepulin, në atë që konsiderohet si një gjysmëfinale. E njëjta gjë do të ndodhë edhe me grupin 2, ku kampionët e Azisë do të ndeshen me kampionët e Afrikë, dhe fituesje do të luajë ndaj San Paolos. Gjatë prezantimit të kalenadrit nga FIFA, organi drejtues i futbollit europian, ishte i pranishëm edhe Andi Harper, drejtuesi i Sidneit, skuadra kampione e Oqeanisë. Ai u shpreh i lumtur nga fakti që skuadra e tij do të ketë shansin të luajë me Liverpulin, në rast se fiton ndaj Deportivos: "Australia ka një ndikim të madh nga futbolli britanik, dhe fakti që do të luajmë ndaj Liverpulit është një nder për ne." Interesant është fakti se trajneri i Sidneit është ish-futbollisti i famshëm gjerman Pier Litbarski, dhe sulmuesi kryesor i kësaj skuadre është ish-sulmuesi i Mançester Junaitedit, Duajt Jork. (Nga Sportishqiptar)