Na ishte dikur një gjarpëreshë e bardhë, e cila u shndërrua në një vajzë të bukuar. Banorët vendës e quajtën atë " Bai Njangzi ", që do të thoshte Bukuroshja e Bardhë. Një gjarpëreshë tjetër me ngjyrë të blertë u shndërrua në një vajzë me gjallëri rinore dhe ia vuri vetes emrin " Siao Qing ".

Ato erdhën së bashku për të luajtur në liqenin Sihu të qytetit Hangzhou. Bukuroshja e Bardhë u njoh me një shkollar të pashëm që e quanin Shy Sian dhe i lindi ndjenjë dashurie për të. Pas disa kohësh, me ndërmjetësimin e Siao Qingut, Shy Sian e mori Bukuroshen e Bardhë për grua. Ata jetonin të lumtur, por një murg budist me titullin fetar "peshkopi Fahai" i tempullit Gjinshan e quante Bukuroshen e Bardhë si grua shpirtzezë, që mund t'i sillte popullit fatkeqësi, dhe i tha Shy Sianit se gruaja e tij ishte personifikimi i një gjarpëreshe të bardhë dhe i mësoi atij metodën për të vrojtuar atë më tej.

Shy Sian nuk besonte plotësisht. Një herë, me rastin e festës së Varkave të Dragonjve, Shy Sian e detyroi të shoqen të pinte raki sipas zakonit popullor, siç i kishte mësuar Fahai. Por efekti i rakisë e zbuloi figurën e saj origjinale prej gjarpëreshe dhe, si pasojë, Shy Xian u tremb dhe vdiq aty për aty.

Bukuroshja e Bardhë vendosi të ringjallte të shoqin dhe u nis për në malin e shenjtë Kunlun, për të kërkuar barna të shenjta medicinale, pa marrë parasysh gjendjen e saj shëndetsore, kur ishte shtatzënë. Shenjti u prek nga veprimi i saj dhe i dhuroi një bar. Shy Sian u ringjall dhe kuptoi se e shoqja donte atë me zemër e me shpirt, kështu që, burrë e grua filluan të donin më shumë njëri tjetrin.

Mirëpo, peshkopi Fahai nuk toleronte ekzistencën e Bukuroshes së Bardhë në botën njerëzore. Ai mori Shy Sian në tempullin Gjinshan dhe e detyroi të bëhej murg. Bukuroshja e Bardhë dhe Siao Qing u indinjuan dhe sulmuan kundër tempullit Gjinshan, me qëllim që të shpëtonin Shy Sian. Ata bënë magji, duke sjellë ujë të furishëm për të rrethuar tempullin. Peshkopi Fahai gjithashtu bëri magj. Bukuroshja e Bardhë dhe vajza Siao Qing nuk përballonin dot Fahai dhe ikën gjetiu. Rrugës, ato gjetën Shy Sian, që kishte dalë fshehurazi nga tempulli Gjinshan.

Sapo Bukuroshja e Bardhë lindi djalin e saj, Fahai erdhi dhe e shtypi atë nën pagodën Leifeng. Në formulën e tij magjike thuhej se Bukuroshja e Bardhë kurrë nuk do të kthehej më në botën njerëzore, përveç se do të thahej uji i liqenit Sihu dhe do të rrëzohej pagoda Leifeng. Pas disa vjetësh, Vajza Siao Qing u kthye, mposhti peshkopin Fahai, kulloi ujin e liqenit Sihu, rrënoi pagodën Leifeng dhe shpëtoi Bukuroshen e Bardhë. (Zheng)