Në fjalimin e mbajtur ditët e fundit në panairin e arsimit ndërkombëtar të Pekinit, zv-shefi i Komitetit Arsimor të Pekinit Xian Lianping tha se Pekini do të përgatisë kryesisht kuadro olimpikë të gjuhëve të huaja. Sipas kërkesave të Lojërave Olimpike të Pekinit për kuadro të gjuhëve të huaja, shkollat e larta përkatëse do të shtojnë numrin e studentëve të pranuar të gjuhës angleze, gjuhës franceze, gjuhës ruse, gjuhës gjermane etj. me qëllim që deri në vitin 2008, studentët e gjuhëve të huaja të arrijnë në 30 mijë veta. Qysh nga viti 2005, në disa shkolla të mesme të ciklit të lartë do të krijohet kursi i gjuhëve të huaja të folura dhe do të zgjerohen nga viti në vit përmasat e nxënësve të këtij kursi. Njëkohësisht do të forcohet edhe përgatitja e kuadrove të gjuhëve të vogla.

Krahas këtyre, Pekini do të mbulojë plotësisht rolin e kuadrove të shkollave të larta sportive të Pekinit, do të zgjedhë 10 mijë trajnerë dhe gjyqtarë të shquar dhe do të zgjedhë nxënës me talent sportiv nga shkollat e mesme të mbarë vendit për t'i përgatitur në shkolla të larta sportive. Në të njejtën kohë, Pekini do të përgatisë edhe sportistë me të meta fizike për të marrë pjesë në Lojërat Paralimpike, do të përkrahë kryesisht zhvillimin e degëve të shkencës lidhur me Lojërat Olimpike si administrimin e transportit, ndërtimin dhe administrimin e qytetit, ekonominë sportive, shërbimet moderne etj.

Xian Lianping tha se për të organizuar mirë Lojërat Olimpike, krahas pajisjeve të plota, duhen edhe shumë punonjës dhe vullnetarë në shërbim të Lojërave Olimpike. Sipas të dhënave të komitetit organizativ të Lojërave Olimpkke të Sidneit, punonjësit dhe vullnetarët e Lojërave Olimpike të Sidneit të vitit 2000 arritën në 47 mijë veta, ndër të cilët 60% ishin vullnetarë të rinj, ata u shërbyen direkt Lojërave Olimpike. Xian Lianping vuri në dukje se rinia është forcë e rëndësishme për organizimin e mirë të Lojërave Olimpike, cilësia e shërbimeve të tyre lidhet direkt me cilësinë e Lojërave Olimpike. Prandaj para vitit 2008, Pekini do të përgatisë sistematikisht studentë dhe nxënës për sportin olimpik me qëllim që ata të njohin dhe kuptojnë vërtet sportin olimpik dhe do të japin kontributin e vet për Lojërat Olimpike të Pekinit. Njëkohësisht organet përkatëse do të përgatisin edhe aftësinë e të folurit, pikëpamjen për shërbime, aftësinë profesioniste etj. të vullnetarëve të rinj. (Fani)