Nga të dhënat statistikore del se, në vitin 2004, çmimet e shtëpive të banimit në Kinë u ngritën mesatarisht 14%. Sivjet, kjo ngritje nuk është ngadalësuar. Siç rezultoi nga të dhënat e Drejtorisë Shtetërore të Statistikave, në tremujorin e parë të këtij viti, çmimet e shtëpive të banimit në 35 qëytete të mëdhenj dhe të mesëm u ngritën 10% në krahasim me të njëjtën periudhë të vitit të kaluar, bile në disa qytete u ngritën 20%, duke kaluar aftësinë e blerësve për të përballuar.

Profesori Zhao Xijun, zv-drejtori i institutit studimor të monedhave dhe obligacioneve pranë Universitetit Renmin, shprehu mendimin se ngritja e çmimeve të shtëpive të banimit u shkaktua nga shumë faktorë.

"Ende jemi larg nga zgjidhja e plotë e problemit të shtëpive të banimit. 80% i blerësve të shtëpive i blejnë ato për të përdorur vetë. Në periudhën e mëparshme, ne zgjidhëm problemin e sigurimit të bukës dhe të veshmbathjes, kurse problemi i banimit dhe transportit mbetet një problem i rëndësishëm që duhet ta zgjidhim më tej. Një pjesë e madhe e banorëve kanë ndër mend të përmirësojnë kushtet e banimit, gjë që përbën një kërkesë të madhe në shkallë kombëtare. Është e pamundur që kjo kërkesë të plotësohet brenda një kohe të shkurtër. Ngritja e çmimeve të shtëpive të banimit për një kohë të gjatë varet nga marrëdhëniet midis ofertës dhe kërkesës në periudhën e tanishme."

Sot, qeveria kineze i kushton shumë vëmendje faktit se çmimet e shtëpive të banimit në disa qytete të Kinës ngrihen shumë shpejt dhe në mënyrë të vazhdueshme, gjë e cila ka rrezik të çojë ekonominë e ndërtimit të shtëpive të banimit në një ekopnomi të flluskës së sapunit dhe mund të ushtrojë ndikime negative për ekonominë kineze. Qeveria kineze e konsideron frenimin e ngritjes tepër të shpejtë të çmimeve të shtëpive të banimit si një përmbajtje të rëndësishme të punës së makrokontrollit të ekonomisë kineze të këtij viti.

Në dhjetëditëshin e dytë të marsit të këtij viti, Banka Qendrore Kineze ngriti kamatën e kredive të blerjes së shtëpive të banimit, si masa e parë që u mor për frenimin e ngritjes tepër të shpejtë të çmimeve të shtëpive të banimit. Më vonë, edhe bankat Shang-ye në krahina të ndryshme, ngritën "pragun e derës" së kredive. Doktori Yin Zhongli i institutit studimor pranë Akademisë së Shkencave Shoqërore të Kinës shprehu mendimin e tij lidhur me vendimin e Bankës Qendrore Kineze për ngritjen e kamatës së kredive të blerjes së shtëpive të banimit:

"Kësaj here, Banka Qendrore Kineze rregulloi parimin politik, por në fakt, ky është hapi i parë i zbatimit të një sërë parimesh politike për makrokontrollin e ndërtimit të shtëpive të banimit. Sot e më tutje, do të dalin në pah edhe masa të tjera përkatëse, me qëllim që të frenohet ngritja tepër e shpejtë e çmimeve të shtëpive të banimit."

Doktori Yin Zhongli vuri në dukje se kësaj here, duke ngritur kamatën e kredive të blerjes së shtëpive të banimit, Banka Qendrore Kineze u dha një sinjal të qartë investuesve dhe konsumatorëve se dikasteret përkatëse qeveritare po fillojnë të implikojnë aktivisht në rregullimin dhe kontrollin e çmimeve të shtëpive të banimit.

Korrespondentët tanë vunë re se masat e makrokontrollit, që ka marrë Banka Qendrore Kineze, kanë dhënë efekt dhe gjithnjë e më shumë konsumatorë presin të blejnë shtëpi duke mbajtur para në dorë.

Disa ditë më parë, në qytetin Pekin u organizua një panair shumë i madh i shtëpive të banimit, ku nuk pati shumë konsumatorë që blenë shtëpi, megjithëse erdhën shumë banorë për të parë shtëpi. Zonja Liu Ying, që erdhi për të parë shtëpi, tha:

"Desha të blinja një apartament. Por tani çmimet e shtëpive janë aq të larta dhe Banka Qendrore ka ngritur kamatën e kredive të blerjes së shtëpive private të banimit, prandaj unë dua të pres edhe disa kohë."

Drejtuesi i sektorit organizativ i këtij panairi bëri të ditur se vëllimi i kontratave në këtë panair u ul 40% në krahasim me vitin e kaluar.

Krahas ngritjes së kamatës së kredive të blerjes së shtëpive, qeveria kineze mori edhe disa masa të tjera për stabilizimin e çmimeve të shtëpive të banimit: të kontrollohet rreptësisht përmasa e heqjes së shtëpive të vjetra, me qëllim që të zbuten kontradiktat midis ofertës dhe kërkesës; të rregullohet rendi i tregut të shtëpive; të forcohet kontrolli i blerjes së shtëpive për qëllim investimi; të kontrollohet ndërtimi i shtëpive jo të banimit dhe të shtohet ndërtimi i shtëpive të zakonshme me çmim të ulët, e të tjera. (Zheng)