dëgjoni

Më 26 qershor, në mbrëmje, u zhvillua solemnisht në stadiumin e punëtorëve të Pekinit ceremonia e shpalljes së parullës tematike të Lojërave Olimpike të Pekinit në vitin 2008. Nën ankthin e pritjes të mijëra mysafirëve në stadium, anëtari i Komitetit të Përhershëm të Byrosë Politike të KQ të PK të Kinës, Li Changchun shpalli:

"Parulla tematike e Lojërave Olimpike të vitit 2008 është 'Një Botë, Një Ëndërr'"

Parulla tematike e Lojërave Olimpike është përmbledhja e lartë e konceptit olimpik dhe e kulturës së vendit organizator.Komiteti Organizativ i Lojërave Olimpike të Pekinit tha se kjo parullë shpreh, nga njera anë, aspiratën e përbashkët të gjithë botës për kërkimin e një të ardhmeje të bukur të njerëzimit nën ndikimin e frymës së olimpiadës, nga ana tjetër, ëndrrën e banorëve të Pekinit dhe të popullit kinez, që janë gati të krijojnë së bashku me popujt e tjerë të botës vatrën e bukur dhe të gëzojnë së bashku rezultatet e qytetërimeve.

Specialisti për problemet olimpike i Universitetit të Pekinit, Zhang Yiwu është i mendimit se kjo parullë tregon dëshirën e popullit kinez për t'u afruar aktivisht botës dhe për të shkuar harmonikisht me popujt e ndryshëm të botës. Profesori Zhang tha:

"Thelbi i kësaj parulle është bota dhe ëndërr. 'një botë' do të thotë se Kina ka dëshirën e hapur për t'u lidhur me botën, ndërsa 'një ëndërr' shpreh shpresën e përbashkët tëe Kinës dhe të botës për Lojërat Olimpike, për paqen dhe për të gjitha konceptet e tjera të vlerës, që meritojnë të kërkohen nga njeriu."

Meriton të themi që kjo parullë nuk është krijuar veçmas nga ndonjë person, por është rezultat i mençurisë së mijëra njerëzve në mbarë botën. Qysh nga 1 janari i këtij viti, ky komitet filloi të vjelë në mbarë botën parulla tematike olimpike. Gjatë një periudhe njëmujore të vjeljes, ai ka grumbulluar mbi 210 mijë parulla nga të gjitha krahinat kineze, nga SHBA-ja, Anglia, Franca, Japonia, Koreja e Jugut, Kuba, Norvegjia dhe Brazili. Krahas gjuhëve kineze dhe angleze, parullat janë shkruar edhe në gjuhët franceze, spanjole, portugeze, etj. Këto parulla kanë dhënë material të pasur për krijimin e parullës tematike të Lojërave Olimpike të Pekinit.

Punonjësit e Komitetit Organizativ të Lojërave Olimpike të Pekinit bën statistikën e 800 parullave, të zgjedhura nga 210 mijë parulla dhe zbuluan se fjalët që qenë përdorur më shumë janë "harmoni", "ëndërr", "unitet" dhe "gëzim i përbashkët". Këto fjalë rastisën të përputhen me propozimin e Kinës në kominitetin ndërkombëtar për harmoni dhe fitimin e përbashkët.

Në të njetën kohë, Komiteti Organizativ i Lojërave të Pekinit ngarkoi edhe 3 kompani të njohura për marrëdhëniet publike ndërkombëtare të bënin hetime në mbarë botën. 968 specialistë të 66 vendeve, që nuk e flasin gjuhën kineze si gjuhë nëne dhe që merren posaçërisht me projektimin e garave sportive, pranuan sondazhe telefonike ose të atypëratyshme. Këto sondazhe kanë luajtur rol të rëndësishëm referimi për përcaktimin e parullës përfundimtare.

Pas përfundimit të punëve të mbledhjes dhe të hetimeve, Komiteti Organizativ i Lojërave Olimpike të Pekinit, duke marrë parasysh mendimet e qindra specialistëve kinezë e të huaj në degët e gjuhësisë, të kulturës dhe të sportit, përcaktoi më në fund parullën tematike për Lojërat Olimpike të Pekinit "Një Botë, Një Ëndërr", me të cilën asnjë parullë e vjelë nuk përputhet plotësisht.

Kjo parullë u vlerësua lart nga kryetari i Komitetit Olimpik Ndërkombëtar Xhak Rog. Ai tha se kjo parullë rrok thelbin e shpirtit të Olimpiadës dhe Komiteti Olimpik Ndërkombëtar shprehet i kënaqur për të.(Wang Lei)