dëgjoni

Duke i sjellë provincës Heilongjiang raste të mëdha tregtare, panairi vjetor ekonomiko-tregtar i Harbinit po bëhet një dritare e rëndësishme ekonomiko-tregtare e provincave të tjera të Kinës ndaj botës së jashtme.

Sipas të dhënave statistikore fillestare, në këtë panair, që sapo u mbyll kohët e fundit, përveç provincës Heilongjiang, delegacionet tregtare të provincave, të rajoneve dhe të qyteteve të ndryshme të Kinës nënshkruan kontrata të import-eksportit që kapën një vlerë prej 540 milionë dollarësh amerikanë, shifër kjo që u shtua 27 herë në krahasim me panairin e vitit të kaluar, ato zunë 13,9% të vëllimit të përgjithshëm të kontratave të import-eksportit, të nënshkruara në këtë panair.

Gazetari mësoi nga komisioni organizator i këtij panairi se në këtë panair morën pjesë mbi 11 mijë tregtarë të huaj dhe 110 mijë tregtarë kinezë. 36 grupe tregtare nënshkruan kontrata me tregtarët e 45 vendeve ose rajoneve të botës.

Delegacionet e provincave Zhejiang, Jilin, Liaoning, Shanxi dhe Qinghai nënshkruan 150 kontrata të bashkëpunimit ekonomiko-tregtar, investimet e përgjithshme arritën në 12 miliardë juanë.

Sipas njoftimeve, mallrat e eksportit të këtij panairi janë kryesisht produktet tekstile, rrobat, pjesët e automjeteve, pajisjet elektro-shtëpiake etj. Mallrat e importit janë kryesisht druri, nafta, lëndët e para të industrisë kimike, plehrat kimike, makina të ndryshme etj. Njëkohësisht pesha e kontratave të eksportit të produkteve elektro-mekanike u shtua me përmasa të mëdha. Vëllimi i kontratave të eksportit të produkteve elektro-mekanike arriti në 680 milionë dollarë amerikanë, duke u shtuar 4,2 herë në krahasim me panairin e vitit të kaluar.

Panairi i Harbinit është një panair i madh ekonomiko-tregtar ndërkombëtar, i miratuar nga Këshilli i Shtetit. Qysh nga viti 1990, janë organizuar 15 të tillë. Në çdo panair kanë marrë pjesë mbi 50 vende ose rajone të botës dhe vëllimi i kontratave ka arritur në 70 miliardë dollarë amerikanë. Tani, provinca Heilongjiang është bërë urë e rëndësishme e provincave, rajoneve dhe e qyteteve të ndryshme të Kinës, si dhe e vendeve ose rajoneve të botës për zhvillimin e bashkpunimit ekonomiko-tregtar me Rusinë. (Sihai)