Brazili e ka nisur mirë Kupën e Konfederatave, pasi arriti një fitore spektakolare 3-0, ndaj kampiones së Europës, Greqisë. 4 minuta para përfundimit të pjesës së parë, Adriano arriti të shënonte një gol spektakolar, duke i dhënë avantazhin ekipit të tij. Dy minuta më pas, 21-vjeçari Robinjo, kishte mundësi t'a dyfishonte rezultatin, por gjuajtja e tij përfundoi disa metra larg portës së Nikopolidisit.

Pas pushimit, grekët dukeshin akoma më të shpërqendruar dhe në minutën e parë të pjesës së dytë, Robinjo arriti të dyfishonte rezultatin, pas një vrapimi të gjatë të Zhilbertos, gjuajtja e të cilit u kthye në asist, për sulmuesin e Santosit. Në minutën e 81-të, mesfushori i Lionit, Zhuninjo, shënoi golin e tretë, pas një goditjeje dënimi, të ekzekutuar me mjeshtëri. Brazili arriti fitoren e parë në grupin B dhe kryeson në kuotën e 3 pikëve, bashkë me Meksikën, e cila fitoi 2-1 ndaj ekipit japonez.