dëgjoni

Ditët e fundit, Ministria Kineze e Arsimit bëri të ditur se vitin e kaluar në Kinë kishte 110 mijë studentë të huaj, shifër kjo që u shtua 42% në krahasim me atë të vitit 2003. Një funksionar i Ministrisë Kineze të Arsimit tha se qeveria kineze do të marrë masa të reja për studimin e studentëve të huaj në Kinë.

Sipas të dhënave të Ministrisë Kineze të Arsimit, këta 110 mijë studentë kanë ardhur nga 178 vende të botës, si nga Republika e Koresë, Japonia, SHBA-ja, Vjetnami, Indonezia, etj.

Qeveria kineze përkrah aktivisht studimin e studentëve të huaj në Kinë, ka bërë përpjekje të mëdha për përmirësimin e sistemit administrativ dhe ka përgatitur një numër të madh pedagogësh për studentët e huaj që studiojnë në Kinë. Njëkohësisht zhvillimi i madh ekonomik i Kinës përbën një forcë të madhe për tërheqjen e studentëve të huaj. Zonja Chen Yinhui, që përgjigjet për punën e studentëve të huaj që studiojnë në Kinë tha se shkaqet kryesore të shtimit të numrit të studentëve të huaj në Kinë janë:

Zhvillimi ekonomik i Kinës gjatë viteve të fundit, veçanërisht zhvillimi i saj arsimor i ka bërë shumë vende të tjera të botës ta njohin arsimin e lartë të Kinës dhe gjithnjë e më shumë studentë të huaj zgjedhin studimet në Kinë. E dyta, me zhvillimin e shpejtë ekonomik u shtua edhe forca tërheqëse e kulturës tradicionale të Kinës. Të gjitha këto kanë nxitur shtimin e madh të studentëve të huaj në Kinë.

Vitin e kaluar studentët e huaj u shpërndanë në 420 shkolla të larta në krahina të ndryshme të Kinës. 95 % e këtyre studentëve të huaj kanë ardhur për studime në Kinë me shpenzimet e veta. Specialitetet që studiojnë këta studentë të huaj përfshijnë fushat e gjuhë-letërsisë kineze, të ekonomisë, drejtësisë, të shkencave natyrore, të bujqësisë dhe të mjekësisë.

Studenti jugkorean Ki Joon Kvon studion tani në institutin ekonomik të Universitetit të Pekinit. Ai i tha korrespondentit tonë se zgjedhja e tij për studime në Kinë është një zgjedhje e mirë dhe largpamëse. Sepse shumë ndërmarrje të mëdha jugkoreane, veçanërisht institucionet financiare të Koresë së Jugut dëshirojnë të njihen me Kinën. Një student jugkorean, në rast se diplomohet në një universitet të njohur të Kinës, mund të gjejë një punë me pagë më të mirë se ata që diplomohen në shkollat e larta të Koresë së Jugut. Ai tha:

Për arsye se qeveria dhe ndërmarrjet jugkoreane kanë hartuar shumë politika të privilegjuara, gjithnjë e më shumë të rinj dhe të reja jugkoreanë zgjedhin të studiojnë në Kinë.

Zonja Chen Yinhui nga Ministria Kineze e Arsimit tha se studentë, si Ki Joon Kvon, që studiojnë në Kinë, shërbejnë si misionerë të miqësisë dhe të bashkëpunimit, por vlerësohen edhe si pasuri të çmuara njerëzore si për vendet që dërgojnë studentët e tyre për studime në Kinë, ashtu edhe për vendet që pranojnë studimet e tyre. Ajo bëri të ditur se sektorët arsimorë të Kinës do të marrin edhe masa të reja për të tërhequr më shumë studentë të huaj për studime në Kinë.

Këto masa të reja do të jenë: forcimi i administrimit arsimorë të studentëve të huaj dhe përgatitja e pedagogëve kinezë; përsosja e sistemit të sigurimeve mjeksore për studentët e huaj në Kinë; krijimi i lehtësirave të mëtejshme për studentët e huaj dhe forcimi i shërbimeve për ta.

Zonja Chen vazhdoi: Ministria Kineze e Arsimit do të punojë më shumë për garantimin e cilësisë së studentëve të huaj në Kinë dhe do të krijojë një sistem për vlerësimin e cilësisë studentëve të huaj, për të siguruar cilësinë e mësimdhënies të shkollave të larta kineze që pranojnë studentët e huaj. ( zhang )