Zhuge Liang ra në mendime. Papitur, i erdhi ndër mend një taktikë. Ai dha urdhrin që të gjithë banorët e qytetit dhe ushtarët të tërhiqeshin nga qyteti dhe të strehoheshin në një vend të sigurt, pastaj ai hapi portën e qytetit dhe filloi të priste ardhjen e armiqve.

Pas pak kohe, gjenerali Sima Yi i Veit, duke komanduar trupat e tij, rrethoi qytetin Siçeng. Por ai u çudit, pse ishte e hapur porta e qytetit, që zakonisht mbrohej nga shumë rojtarë? Ngriti kokën dhe shikoi, nuk kishte asnjë rojtar në murin e qytetit dhe shihej vetëm një plak që punonte për të pastuar fushën para portës së qytetit. Në çastin kur po vriste mendjen, Sima Yi pa se një njeri u duk në murin e qytetit, ishte pikërisht Zhuge Liang, kundërshtari i tij i regjur. Zhuge Liang rregulloi pa nxitim veshjet e tij dhe u ul pranë një instrumenti muzikor Guqin, që ishte vendosur aty që më parë. Pastaj, erdhën nga andej tingujt e bukur të muzikës. Të gjithë komandantët dhe ushtarët e Veit u shtangën nga habia dhe pyetën veten se si ishte puna, pse Zhuge Liang filloi t'i binte instrumentit Guqin në një moment kritik kur qyteti u rrethua nga aq shumë trupa kundërshtare.

Gjenerali Sima Yi dredhacak mendoi dhe gjykoi se ishin vënë në pritë shumë trupa brenda qytetit. Ndërkohë, tingujt e muzikës sipër murit të qytetit u shpejtuan dhe ngjanin si shi e stuhi. Sima Yi pandehu se ky ishte sinjal që po jepte Zhuge Liang për veprime ushtarake dhe dha urdhrin që trupat e tij të tërhiqeshin . Në këtë mënyrë, qyteti Siçeng u mbrojt, pa qenë nevojë të përdorej asnjë ushtar. (Zheng)