Kryekomandanti Zhou Yu i forcave të Sun Quanit ndërmori një taktikë dredharake, që e quajti "taktikën e dhembjes trupore". Ai thirri në një mbledhje gjeneralët për të diskutuar rreth mbrojtjes nga sulmi i trupave të Cao Caos. Gjenerali veteran Huang Gai e hoqi veten si frikacak dhe tha me dredhi: "Kundërshtari është tepër i fuqishëm, më mirë të dorëzohemi." Zhou Yu bëri sikur u xhindos nga inati dhe urdhëroi ta dënonin me 50 të goditura me shkop ushtarak, personat përkatës e rrahën plakun me gjithë mend.

Natën vonë, Gjenerali veteran Huang Gai dërgoi një njeri t'i përcillte një letër të tij Cao Caos, ku thuhej se ai currente në palcë kryekomandantin e tyre Zhou Yu dhe kishte vendosur të dorëzohej. Ndërkohë, një agjent i Cao Caos, që ishte kamufluar në radhët e forcave të kundërshtarit, u kthye fshehurazi dhe i raportoi Cao Caos se kishte parë me sytë e vet se Huang Gai ishte rrahur keq. Në këtë mënyrë, Cao Cao besoi se Huang Gai do të dorëzohej me të vërtetë.

Pikërisht në atë kohë, erdhi tek Cao Cao një intelektual i shquar me emrin Pang Tong. Me propozimin e tij, ushtarët e Cao Caos lidhën nga 50 anije në një zinxhir dhe shtruan sipër dërrasa druri, me qëllim që ushtarët të luftonin më lehtë. Kurse këshilltari i tij tha: "Në qoftë se armiku do të na sulmojë me zjarr, ne do të ndodhemi në rrezik të madh." Cao Cao qeshi me zë të lartë dhe tha: "Mos kini merak. Ne jemi në bregun verior të lumit, kurse ata janë në bregun jugur. Tani është dimër, dhe shpesh fryjnë erëra e veriut. Në qoftë se ata do të sulmojnë me zjarr, do të digjen ata vetë." Të gjithë të pranishmit brohoritën për zgjuarësinë e Cao Caos.

Filloi papritur një erë nga juglindja. Cao Cao mori një letër nga Huang Gait, ku shkruhej mënyra e kapitullimit. Cao Cao dhe gjeneralët e tij dolën në kuvertën e anijes për të pritur. Ai u gëzua pa masë kur pa se Huang Gai, në krye të 10 anijeve të vogla, po vinte nga frynte era.

Kur anijet e Huang Gait po u afroheshin anijeve luftarake të Cao Caos, Huang Gai bëri shenjë me dorë dhe anijet e tij morën zjarr befasisht. Doli se 10 anijet ishin ngarkuar plot me kashtë dhe vaj. Anijet me flakë u futën midis anijeve luftarake të Cao Caos, të cilat morën flakë menjëherë. Meqenëse ishin të lidhura së bashku, anijet e tij nuk shkëputeshin dot dhe u bë një det zjarri. Cao Cao la anijet dhe doli në breg, por kazermat e tij ishin djegur nga ushtarët e Zhou Yusë që ishin në pritë. Trupat aleate Sun-Liu sulmuan fuqimisht dhe trupat e Cao Caos u mposhtën keqas. Cao Cao theu rrethimin dhe iku për t'u kthyer në veri.