Në vitin 52 para erës së re, monarku i hunëve Çan-yu Huhan-ye pësoi disfatë në luftën e tyre civile dhe, në krye të forcave të tij të armatosura, erdhi për strehim në perandorinë Han. Kur ai mbërriti në kryeqytetin Çang-an, perandori Xuandi doli nga porta e qytetit për ta pritur atë, ministrat dhe oficerët madhorë, të rreshtuar në të dyja anët e rrugës, e përshëndetën dhe mijëra veta nga masat popullore brohoritën. Ai u befasua nga kjo tablo e ngrohtë. Pas disa kohësh, i mbrojtur dhe i përcjellë nga 16 mijë ushtarë të kalorësisë të dinastisë Han, të dërguar me urdhrin e perandorit Xuandi, Çan-yu Huhanye u kthye në vendin e vet.

Në vitin 33 para erës së re, Çan-yu Huhan-ye erdhi përsëri në Çang-an dhe kërkoi të merrte për grua një vajzë nga kombësia Han. Perandori Yuandi, perandori i ri i dinastisë Han e la atë të zgjidhte nga vajzat e oborrit perandorak. Shumica e vajzave në oborrin perandorak nuk deshën të largoheshin nga vendi i vet, por njëra nga ato doli përpara dhe tha se ajo deshi të martohej me Çan-yunë e hunëve. Ajo vajzë e kishte emrin Vang Zhaogjun dhe sapo ishte zgjedhur nga Hubei dhe kishte ardhur në oborrin perandorak. Çan-yu Huhan-ye u kënaq pa masë, sepse ajo ishte jashtëzakonisht e bukur.

Perandori Yuandi porositi një person të posaçëm që t'i mësonte Vang Zhaogjunit gjuhën e hunëve, porositi një muzikant që t'i mësonte asaj t'i binte instrumentit Pipa dhe porositi një person tjetër të posaçëm që t'i tregonte asaj doket dhe zakonet e hunëve.

Kur dhëndri dhe nusja e re po niseshin për në vendin e hunëve, perandori Yuandi bashkë me ministrat dhe gjeneralët i përcollën ngrohtësisht. Në atë moment, Vang Zhaogjun qau, e ngriti instrumentin Pipa dhe interpretoi një melodi të bukur dhe prekëse. Në bazë të asaj melodie, kompozitorët e gjeneratave të mëvonshme kompozuan melodinë me tutullin "Vajtja e Zhaogjunit jashtë Murit të Madh".

Çan-yu Huhan-ye e donte shumë nusen e re. Ata patën një djalë të lezetshëm. Pas vdekjes së Çan-yu Huhan-ye, biri i tij i madh nga gruaja e parë u bë monark i hunëve dhe, sipas zakoneve të tyre, e mori për grua Vang Zhaogjun, që ishte njerka e tij. Ata patën dy vajza.

Vang Zhaogjun jetoi më se 60 vjet në tokat e hunëve. Sot, vizitorët që vijnë për turizëm në Kinë, shohin një varrezë në periferi të qytetit Huhëhot, kryeqendër e rajonit autonom të Mongolisë së Brendshme. Atje është shkruar "Zhaogjun Mu", që do të thotë varreza e Vang Zhaogjunit dhe që është quajtur "Varri i blertë" në veprat letrare klasike.(Fund)