I riu Feng Yan Gjing i kombësisë Tai, që banon në fshatin Hehuan të këtij qarku, na tregoi për ndryshimin e gjendjes ekonomike të familjes së tij, që është një familje me 8 frymë. Më parë, ata mbillnin të 3.3 dynymë tokë vetëm me oriz dhe të ardhurat kanë qenë të pakta. Kurse, para 4 vjetëve, ata mbollën gjithë tokën me drurë kafeje dhe, si rezultat, gjendja ekonomike e familjes së tij ka ndryshuar dhe e gjithë familja e shikon tokën si "margaritar".

"Tani, kemi më shumë të ardhura në krahasim me vitet e kaluara kur kultivonim vetëm oriz. Të ardhurat tona vjetore nga kultivimi i drurëve të kafesë arrijnë në 8000 juanë. Kam plan që të mbjell edhe më shumë drurë kafeje."

Ka ndryshuar gjendja ekonomike e shumë familjeve të tjera të fshatit Hehuan, ku banon Feng Yan Gjing. Më parë, disa nga 67 familjet e këtij fshati jetonin duke u mbështetur në shitjen e fidanëve të orizit, prandaj kishin kushte të këqija të jetesës. Shumë prej tyre flinin në kasolle të thjeshta. Edhe kushtet higjenike ishin të këqija. Prandaj i gjithë fshati konsiderohej si fshati më i varfër në këtë zonë. Vitet e fundit, të ardhurat e të gjitha familjeve të këtij fshati janë shtuar për shkak se kafeja e tyre shitet shpejt dhe me çmim të mirë. Gjatë vizitës në këtë fshat, korrespondenti ynë kanë parë me sytë e vet se çdo familje ka sot shtëpi të reja të ndërtuara me tulla dhe me drurë dhe shumica e familjeve kanë blerë televizorë me ngjyra, aparate VCD, traktorë të lehtë dhe sende të tjera. Edhe shkolla e këtij fshati ka ndërtesa krejt të reja.

Fshatarët thonë se kultivimi i drurëve të kafesë kërkon teknikë të lartë. Edhe një fatkeqësi e insekteve dëmtuese mund të jetë fatale për ta. Ata vendosën të kultivojnë drurë kafeje sepse ndërmarrja e kafesë Dehong caktoi një politikë favorizuese për fshatarët, e cila qetësoi ata.

Ndërmarrja e kafesë Dehong, që thonë fshatarët, është Shoqëria Aksionare Hongtian, që u formua në vitin 1997 me përkrahjen e fuqishme të administratës së qarkut Dehong. Zv-kryedrejtori i kësaj shoqërie zoti Peng Zhongren tha se ndërmarrja e tij u ka dhënë fshatarëve përkrahje dhe favor në lëmin e fondit dhe të çmimit të grumbullimit të produkteve, me qëllim që ata të kultivojnë drurët e kafesë pa asnjë merak.

"Ne kemi nënshkruar me fshatarët një kontratë për çmimin e mbrojtur të grumbullimit të kokrrave të kafesë: kemi premtuar që të grumbullojmë kokrrat e kafesë së tyre me çmimin jo më pak se 1.3 juanë për kilogram. Kur rritet çmimi i kafesë në treg, edhe ne ngrejmë çmimin e grumbullimit të kokrrave të kafesë së tyre. Kemi premtuar gjithashtu që vëllimi i investimeve të çdo famijeje në kultivimin e një haktar drurësh kafeje të mos kalojë 4500 juanët dhe, po të kalojë, ndërmarrja jonë do të paguajë pjesën e kaluar. Ndërmarrja jonë siguron edhe prodhimtarinë e tyre: mjafton që fshatarët t'u bëjnë shërbime drurëve të kafesë siç drejtojnë teknikët e ndërmarrjes sonë, prodhimtaria e kokrrave të freskëta të kafesë me siguri do të jetë mbi 15 tonë për hektar."

Siç mësohet, për arsye se vitet e fundit është shtuar pandërprerë kërkesa për kafenë brenda dhe jashtë vendit, qarku Dehong ka marrë masa për t'iu përgjigjur kërkesës së tregut, ka përcaktuar objektivin e shfrytëzimit të epërsisë së zonës së vet, duke ndjekur rrugën e zhvillimit të degëve karakteristike të bujqësisë dhe duke e konsideruar prodhimin e kafesë si përmbajtje të rëndësishme të zhvillimit të prodhimeve të blerta. Duke kujtuar fillimin e prodhimit të kafesë, zoti Peng Zhongren tha se, në fillim, kjo zonë kishte vetëm një plantacion kafeje me një sipërfaqe prej 30 hektarësh. Në sajë të shërbimeve të shkëlqyeshme agroteknike, fidanët dhanë fryte qysh në vitin e dytë dhe prodhimi i kokrrave të freskëta të kafesë arriti në 30 tonë për hektar, kurse prodhimi i kokrrave të thata arriti 4.5 për hektar, duke krijuar rekordin e ri të rendimentit të prodhimit të kafesë në sipërfaqe të madhe në vendin tonë. Nga ky shembull, fshatarët e kësaj zone panë perspektivën e zhvillimit të prodhimit të kafesë dhe shtuan besimin e tyre për kultivimin e drurëve të kafesë.

Sipas të dhënave statistikore, deri në fund të vitit 2004, sipërfaqja e mbjellë me drurë kafeje në qarkun Dehong i kaloi 2600 hektarët. Sot 20 mijë familje fshatare merren me këtë degë të bujqësisë dhe, me prodhimin e kafesë, të ardhurat e fshatarëve të këtij qarku shtohen mbi 30 milionë juanë. Sot, plantacionet e kafesë të qarkut Dehong janë bërë një bazë e prodhimeve standarde me shpërndarje racionale dhe me vepra të përsosur ujitëse. Ministria e Bujqësisë e Kinës i ka vlerësuar plantacionet e kafesë të këtushme si "Baza e njohur dhe e shkëlqyeshme e kultivimit të bimëve tropikale në Azinë Jugure". Kafeja e qarkut Dehong eksportohet sot në Singapor, Korenë e Jugut, Vietnam, Arabinë Saudite si dhe vende e rajone të tjera.

Zoti Peng tha se ata kanë ndër mend të zgjerojnë më tej sipërfaqen e mbjellë me drurë kafeje, në mënyrë që të ndihmojnë në pasurimin e sa më shumë familjeve fshatare. (Zheng)