Para më se 2000 vjetëve, hunët që pësuan goditje të rëndë nga forcat e armatosura të perandorisë Han, u tërhoqën në veri të shkretëtirës së madhe dhe nuk patën më guxim të trazonin zonat kufitare të perandorisë Han. Në vitin 100 para erës së re, Gjydihou u bë monark i hunëve, që ata e quanin Çan-yu. Ai ktheu të gjithë të dërguarit e dinastisë Han që ata i kishin mbajtur më parë. Perandori Vudi i dinastisë Han vendosi që, në bazë të parimit të barazisë, të kthente edhe të dërguarit e hunëve, që ishin mbajtur më parë nga dinastia Han dhe dërgoi gjeneral Su Vu që, në krye të 100 personave dhe duke marrë me vete një sasi të madhe sendesh si dhurata, t'i çonte ata në vendin e tyre.

Pasi arritën atje, Su Vu dhe shoqëruesit i tij i dorëzuan monarkut Çan-yu të ri të hunëve të dërguarit e mbajtur nga dinastia Han dhe i dhanë të gjitha dhuratat që ata i kishin marrë me vete. Por monarku Çan-yu Gjydihou u tregua shumë mendjemadh, e mbajti Su Vu, duke u orvatur që, me mënyrat e kërcënimit dhe mashtrimit, ta nënshtronte atë, me qëllim që ai t'u shërbente atyre. Por Su Vu nuk u përkul aspak.

Çan-yu Gjydihou i hunëve e mbajti Su Vu në arrest në një qilar, pa i dhënë ushqime për disa ditë me radhë. Bënte shumë ftohtë dhe jashtë binte borë, megjithatë Su Vu nuk vdiq nga uria dhe nga i ftohti. Më vonë, Çan-yu Gjydihou e internoi Su Vu në një zonë pa gjurmë njeriu në bregun e liqenit Bajkal që të jetonte atje duke kullotur bagëti bashkë me një bareshë hune. Çan-yu Gjydihou tha se Su Vu do të mund të lirohej dhe të kthehej në perandorinë Han, vetëm atëherë kur edhe deshtë do të pillnin shqerra.

Su Vu u mbajt nga hunët për 19 vjet. Në vitin 81 para erës së re, në vendin e hunëve ndodhën turbullira të brendshme dhe Çan-yu Gjydihou deshi të pajtohej me perandorinë Han. Qeveria e dinastisë Han kërkoi që hunët të kthenin në radhë të parë Su Vu dhe personat e tjerë të mbajtur në vendin e hunëve. Pas përpjekjeve të shumta të dinastisë Han, Su Vu dhe 8 persona të tjerë u kthyen në Çang-an. Perandorit Zhaodi, perandorit të ri të dinastisë Han, i erdhi keq për Su Vu. Ai pagoi një sasi të madhe të hollash për kthimin e djalit që kishte lindur ajo bareshë hune me Su Vu dhe i dha djalit një post zyrtar. Su Vu vdiqi në vitin 60 para erës së re, në moshën 80 vjeçare. (Fund)