Në ceremoninë e fillimit të aktiviteteve, zv-drejtori i Drejtorisë së Studentëve pranë Ministrisë së Arsimit të Kinës Liu Dawei tha se qysh nga viti 1999, shkollat e larta të mbarë vendit kanë shtuar nga viti në vit numrin e studentëve të rinj dhe të aspirantëve të pranuar, njëkohësisht shkollat private të larta janë zhvilluar shumë shpejt dhe si rezultat, është shtuar shpejt numri i diplomantëve. Në vitin 2004, u diplomuan 2.8 milionë studentë të shkollave të larta, kurse në vitin 2005, ky numër do të arrijë në 3.38 milionë. Vitin e kaluar, përqindja mesatare e punësimit të studentëve ishte 73% duke ia arritur objektivit të parashikuar. Sipas kërkesave të qeverisë kineze, këtë vit përqindja e punësimit të studentëve nuk duhet të ulet në krahasim me nivelin e vitit të kaluar. Liu Dawei tha se nëpërmjet përpjekjeve, mund të realizohet patjetër ky objektiv.

Siç bëhet e ditur, aktivitetet "T'i kushtojmë vëmendje punësimit të studentëve" do të zhvillohen në mënyra të ndryshme dhe do të zgjatin një kohë të gjatë. Organizatorët do të zhvillojnë biseda, anketa, seminare etj. në televizione, gazeta, revista, vebsaite etj. për të pasqyruar problemet dhe sfidat në punësimin e studentëve dhe për të tërhequr vëmendjen e gjerë të qarqeve të ndryshme shoqërore për punësimin e studentëve. Organizuesit shpresojnë se aktivitetet e tyre do të jenë në favor të krjimit të mjedisit të mirë shoqëror për punësimin e studentëve.

Në aktivitetet "T'i kushtojmë vëmendje punësimit të studentëve" përfshihen "sqarimi i politikave të punësimit të studentëve", "hetimi i ndërmarrjeve që tërheqin studentët", "drejtimi për praktikën e studentëve" etj. Organizatorët do të ftojnë specialistë të punësimit, sipërmarrës, dijetarë etj. të zhvillojnë shkëmbime direkte me studentët për të zgjidhur problemet e studentëve në fushën e punësimit. Për të përgatitur aftësinë e punësimit të studentëve, organizatorët do të zbatojnë edhe "planin e praktikës së studentëve" dhe do të krijojnë në krahina të ndryshme disa baza të praktikës për t'u krijuar studentëve raste të kontakteve me shoqërinë dhe ndërmarrjet.

Aktivitetet "T'i kushtojmë vëmendje punësimit të studentëve" organizohen bashkarisht nga Qendra drejtuese e punësimit të studentëve e Ministrisë së Arsimit të Kinës dhe Shtëpia botuese e arsimit të lartë. Këto aktivitete u zhvilluan për herë të parë në vitin 2004, organizatorët ftuan specialistë të punësimit të mbajnë me dhjetra leksione në shkollat e larta të krahinave të ndryshme që u dhanë studentëve shërbime dhe ndihma në fushën e punësimit duke patur efekt të mirë. (Fani)