Në kuadrin e 50 vjetorit të krijimit të ambsadës kineze në Shqipëri e të ambsadës shqiptare në Kinë, të fillimit të dërgimit reciprok të studentëve kinezë në Shqipëri dhe të studentëve shqiptarë në Kinë si dhe të 40 vjetori të dërgimit të një grupi të madh studentësh kinezë për studime në Shqipëri, z.Fan Chengzhuo dhe z.Zheng Enbo që kanë qënë studentë kinezë për studim në vitet 50 dhe 60 të shekullit të kaluar në Shqipëri dhe kanë punuar shumë vjet në Shqipëri ose janë marrë me çështjet e Shqipërisë rregulluan dhe mblodhën proza, artikuj dhe poezi të shkruar gjatë kontakteve miqësore me Shqipërinë dhe botuan librin me titull "Vite të Paharruara ".

Ky libër është shumë i vlefshëm për miqësinë Kinë-Shqipëri, siç shkruan ambasadori i Shqipërisë në Kinë Kujtim Xhani në parathënien e këtij libri:

" Shqipëria dhe Kina, dy vende gjeografikisht larg njera tjetrës por realisht shumë pranë, festojnë sivjet 55 vjetorin e vendosjes së marrëdhënieve diplomatike. Kjo është një ngjarje e shënuar në historinë e marrëdhënieve në mes dy vendeve tona dhe Prof. Zheng Enbo dhe ambasadori Fan Chenzhuo, me botimin e librit " Vite të Paharruara ", jo vetëm kontribuojnë në miqësinë tonë tradicionale, por përfaqësojnë gjithashtu mesazhet më të mira me këtë rast.

Si ambasadori i Republikës së Shqipërisë në Republikën Popullore të Kinës, kam patur fatin dhe nderin të ndjej nga afër, në takimet zyrtare por edhe në ato me njerëz të thjeshtë, ndjenjat e miqësisë, sinqeritetin e bashkëpunimit dhe dëshirën për rritjen e zhvillimin e mëtejshëm të miqësisë në mes dy popujve e vendeve tona. Botimi i librit nga këta dy autorë, nuk është rastësi. Profesor Zhengu dhe Ambasador Fani, kanë dhënë kontributin e tyre të shquar në marrëdhëniet në mes dy vendeve.

Prof. Zheng është ndoshta i vetmi albanalog që ka përkthyer rreth 90 autorë shqiptar që nga Naim Frashëri e deri autorët e rinj të ditëve të sotme. Për të përshkruar punën kolosale të Prof Zheng më mirë se çdo fjalë tjetër është krahasimi që shkrimtari i madh shqiptar Dritero Agoli i ka bërë punës së tij : " .. puna e prof. Zhengut është e barabartë me atë të një instituti të tërë .. "

Ndjenjat miqësore që Ambasadori Fan ushqen ndaj popullit shqiptar, ashtu sikurse lexuesi do ta vere re në leximin e këtij libri, e kanë shtyrë atë të shquhet jo vetëm në profesionin e tij të nderuar të diplomatit, por edhe në atë të artit. Poezitë e tij janë një histori e marrëdhënieve, janë ndjenja të sinqerta të popullit kinez të shprehura aq bukur dhe me nivel të lartë artistik nga përfaqësuesi i tyre diplomatik në Shqipëri.

Nëpërmjet librit " Vite të Paharruara ", lexuesit kinez ( me përkthimin në shqip të librit më vonë edhe atij shqiptar ) i transmetohet në nivel të lartë artistik një sintez e këtyre marrëdhënieve gjatë këtyre 55 vjetëve, për të cilën kam nderin të shpreh vlerësimet më të larta dhe falenderimet më të mira për kontributin që autorët kanë dhënë dhe vazhdojnë të japin për miqësinë tonë. " (zhai)