Para më se 2000 vjetëve, për arsye se hunët pengonin marrëdhëniet midis perandorisë Han dhe kombësive në zonat perëndimore, perandori Vudi dërgoi gjeneral Huo Qubing për të goditur forcat e hunëve. Si rezultat, mbretëritë Kun-ye dhe Xiuçu u dorëzuan dhe dinastia Han vendosi qarqet administrative Uvei, Zhang-ye, Gjuquan dhe Dunhuang në zonat në perëndim të kështjellës Gjinçeng, sot qyteti Lanzhou i provincës Gansu dhe, kështu, u garantua sigurimi i rrugës së mëndafshit.

Gjatë luftës, mbretërit e Kun-yes dhe Xiuçusë u morën vesh se do të dorëzoheshin, por mbreti i Xiuçusë ndryshoi mendim dhe kjo gjë e zemëroi mbretin e Kun-yes, i cili e vrau atë dhe në krye të banorëve të të dy vendeve u dorëzua. Princi trashëgimtar 14 vjeçar Midi i mbretërisë Xiuçu mori nënën dhe vëllanë e tij të vogël dhe erdhi në Çang-an, kryeqytet i dinastisë Han dhe filloi të punonte për të mbajtur kuaj pranë oborrit perandorak.

Njëherë, perandori Vudi organizoi një paradë ushtarake të kalorësisë. Kalorësit parakaluan para tribunës, të rreshtuar dhe duke tërhequr secili kalin e vet. Të gjithë shikonin vëngër drejt tribunës, vetëm Midi nuk shikonte. Midi ishte një djalë i pashëm dhe kali i tij ishte i shëndoshë dhe i fortë. Perandori Vudi mori vesh se ai djalë kishte qenë princ trashëgimtar i ish-mbretërisë Xiuçu, prandaj e emëroi atë si ministër dhe i dha atij emrin familjar "Gjin", që do të thotë"ar".

Gjin Midi punonte me gjithë seriozitetin e duhur dhe asnjëherë nuk bënte gabime. Për këtë arsye perandori Vudi i bënte atij favore. Nëna e Gjin Midit i kishte edukuar shumë mirë dy bijtë e saj dhe për këtë arsye ajo u lavdërua nga perandori Vudi. Kur vdiq ajo, perandori Vudi ftoi një piktor që të pikturonte portretin e saj në pallatin Ganquan dhe ai la asaj personalisht mbishkrimin "E veja e mbretit të Xiuçusë".

Kur u rrit, Gjin Midi pati dy djem dhe perandori Vudi i donte ata si nipërit e vet. Pasi u rrit dhe u bë burrë, biri i madh i Gjin Midit, i cili ishte tepër i përkëdhelur nga perandori Vudi, nuk i respektonte rregullat e oborrit perandorak dhe çnderoi një vajzë të atjeshme. Për këtë fakt, Gjin Midi e dënoi djalin e vet me vdekje. Perandori Vudi derdhi lot kur mori vesh këtë gjë. Por ai nuk e qortoi Gjin Midin, përkundrazi, filloi të admironte edhe më tepër virtytet e tij.(Fund)