"Në fillim kujtova se ishte çokollatë, por doli se ishte një gazetë e asaj dite kur linda unë. Ah, sa u gëzova! Unë nuk kam marrë asnjë herë një dhuratë të tillë për ditëlindjen. Është diçka kuptimplotë dhe me vlerë më të madhe se dhuratat e tjera siç janë lulet e freskëta ose diçka tjetër."

Këtë gazetë të vjetër miku i saj e bleu në dyqanin Miao Hang të Pekinit të dhuratave për ditëlindjen, i cili merret posaçërisht me tregtimin e gazetave të vjetra që përdoren si dhurata për ditëlindjen. Disa ditë më parë, korrespondenti ynë vizitoi këtë dyqan, që ndodhet në pjesën veriore të qytetit Pekin. Dhoma e dyqanit, që nuk është e madhe, ishte mbushur plot me gazeta të vjetra, që ishin të rregulluara me kujdes, të klasifikuara dhe të vëna në disa rafte prej metali me ngjyrë blu dhe, pranë tyre ishin lënë gazetat që ende nuk ishin rregulluar.

Padroni i dyqanit është një burrë rreth 40 vjeçar me emrin Zheng Gjyn. Ai tha se dyqani i tij shet dy lloje gazetash pas viteve 50 të shekullit të 20-të, gazetën "Renmin Ribao", që është gazeta më me influencë në Kinë, dhe gazetën "Pekin Ribao", që është gazetë lokale e Pekinit. Këto gazeta të vjetra, pas paketimit të kujdesshëm me duart e Zheng Gjynit, bëhen dhurata të jashtëzakonshme.

Ai është i mendidmit se shfrytëzimi i gazetave të vjetra si dhurata është diçka e jashtëzakonshme sepse një dhuratë e tillë për ditëlindjen është e rrallë. Një arsye tjetër e rëndësishme është se ato kanë vlerë kulturore. Kur dikush merr si dhuratë një gazetë të botuar në datën kur lindi ai ose ajo, të gjithë e konsiderojnë këtë si një gjë interesante, sepse ata njohin ngjarjet e mëdha të asaj dite brenda e jashtë vendit.

"Këto gazeta kanë në vetvete një vlerë kulturore dhe historike. Një vlerë të tillë kanë sidomos gazetat e botuara në Pekin, sepse Pekini si qytet i madh, ka atmosferë të theksuar kulturore. Shumë njerëz e konsiderojnë të rëndësishme atmosferën kulturore. Nëpërmjet një gazete të vjetër, që i jepet si dhuratë për ditëlindjen, një person mund të njohë gjendjen historike dhe shoqërore të asaj kohe ku lindi ai. Duke lexuar këtë gazetë, ai mund të ndiejë sikur të hapë një dritare për të njohur të kaluarën, për të njohur historinë. Ja, kjo është domethënia kryesore e dhuratës prej një gazete të vjetër."

Zoti Zheng Gjyn ka pëlqyer gjithmonë të bëjë koleksion gazetash dhe të lexojë gazetat e vjetra në kohën e lirë. Ai hapi dyqanin e tij të dhuratave për ditëlindjen prej gazetave të vjetra, duke qenë i frymëzuar nga një lajm që dëgjoi nga radioja. Në atë lajm thuhej se, në vitet 20 të shekullit të 20-të, një person i njohur kinez i qarkut sportiv mori dhuratën nga një mik i huaj për ditëlindjen e tij, dhe kjo dhuratë ishte gazeta angleze "Taims", e botuar po në atë ditë kur lindi ky person. Kjo gjë e gëzoi atë pa masë. Ky lajm stimuloi frymëzimin e zotit Zheng. Kështu që, ai bëri përsëri sistemimin e gazetave të tij të vjetra, bleu një sasi tjetër të madhe gazetash të vjetra dhe, në gjysmën e dytë të vitit të kaluar, hapi dyqanin e tij të dhuratave për ditëlindjen.

Zoti Zheng tha se ai shet gazetat e vjetra si dhurata për ditëlindjen kryesisht nëpërmjet internetit. Çmimet e këtyre gazetave përcaktohen sipas vitit të botimit të tyre. Zakonisht, një gazetë e vjetër e viteve 50 të shekullit të 20-të bën 300 juanë, kurse një gazetë e viteve 90 të shekullit të 20-të shitet me 80 ose 90 juanë.

Ndërkohë, kur korrespondenti ynë po bisedonte me zotin Zheng, ndihmësi i tij zoti He Sin ishte i zënë duke biseduar me konsumatorët në internet. Zoti He tha se në fillim nuk kishte shumë veta që blinin gazeta të vjetra si dhuratë për ditëlindjen, por tani, gjithnjë e më shumë njerëz kanë njohur dyqanin e tyre. Tani ata shesin dhjtra gazeta në ditë, nganjëherë sasia e shitjes arrin në 100 copë në ditë. Ai tha:

"Tani, çdo ditë ka blerës që porositin gazeta të vjetra nëpërmjet stacionit tonë të internetit. E kemi mirë shitjen dhe konsumatorët reagojnë mirë. Gazetat e vjetra, që shesim si dhurata për ditëlindjen, u sjellin konsumatorëve gëzim, edhe ne gëzohemi për gëzimin e tyre."

Shumë prej klientëve, që kanë blerë gazeta të vjetra si dhurata për ditëlindjen, shkruajnë në internet për të shprehur gëzimin e vet. Një kliente pekinase shkruan: " Falenderoj zotin Zheng, që më ndihmoi për të plotësuar dëshirën time. I dhurova burrit tim një dhuratë interesante për ditëlindjen e tij. Është e mrekullueshme dhurata ime!" Një klient tjetër, zoti Çen shkruan: "Gazetat tuaja janë origjinale dhe i keni ruajtur shumë mirë. Dhurata ime gëzoi mikun tim. Ju faleminderit."

Vijnë njerëz të shtresave të ndryshme për të blerë gazeta të vjetra si dhurata për ditëlindjen dhe shumica e tyre janë arsimtarë dhe nëpunës të kompanive. Disa ditë më parë, zonja Yang Shaomin 27 vjeçare, që punon në një universitet të Pekinit, bleu një gazetë të vjetër dhe i dha burrit të saj si dhuratë për ditëlindjen e tij. Ajo tha se i dhuroi burrit të saj një gazetë të botuar po atë ditë kur lindi ai, me qëllim që të shprehë ndjenjat e saj të dashurisë me një mënyrë krejt të re.(Zheng)