Në vitin 122 para erës së re, diplomati kinez Zhang Qian u kthye në atdhe pas udhëtimit për herën e dytë në zonat perëndimore dhe i paraqiti perandorit Vudi të dinastisë Han një raport, në të cilin thuhej se kur ishte në mbretërinë e Baktrisë, ai kishte parë atje mallra të prodhuara në perandorinë Han, si pëlhura të pambukta dhe bastunë bambuje, të prodhuara në krahinën Shu, sot provinca Siçan e Kinës. Në raport thuhej gjithashtu se banorët e Baktrisë thoshnin se i kishin blerë ato mallra në tregun e mbretërisë Hindu që gjendej një mijë kilometra larg në juglindje. Perandori Vudi dërgoi menjëherë një grup ekspedite të përbërë nga më se 10 veta, për të gjetur mbretërinë Hindu.

Grupi i ekspeditës kaloi shumë male dhe lumenj dhe arriti në mbretërinë Dian në jugperëndim të perandorisë Han, sot një pjesë e provincës Junan të Kinës. Mbreti i Dianit i priti ngrohtësisht pjesëtarët e grupit të ekspeditës dhe dërgoi më se 10 persona si udhërrëfyes për të ndihmuar ata. Pas një viti, ata arritën në Kunming, por nuk gjenin rrugë për të ecur më tej dhe u kthyen përsëri në mbretërinë Dian. Mbreti i Dianit pyeti ata: "Po ta krahasoni perandorinë Han me mbretërinë time, cila është më e madhe?" Ata buzëqeshën pa iu përgjigjur.

Grupi i ekspeditës u detyrua të kthehej me një rrugë tjetër dhe, pas shumë ditësh, arriti në mbretërinë Yelang, sot një pjesë e provincës Guizhou të Kinës. Mbreti i Yelangut pyeti: "Po ta krahasoni perandorinë Han me mbretërinë Yelang, cila është më e madhe?" Anëtarët e grupit të ekspeditës prapë buzëqeshën pa iu përgjigjur. Ata kuptonin se për shkak të kushteve të këqia të transportit, njerëzit në ato zona nuk kishin dalë asnjëherë nga malet, prandaj ishte e natyrshme se ata e kishin të vështirë të përfytyronin se sa të gjera ishin territoret e perandorisë Han.

Pasi u kthye në kryeqytetin Çang-an, grupi i ekspeditës i paraqiti perandorit Vudi një raport, ku thuhej se ekzistonin rreth 100 mbretëri të vogla në drejtim të jugperëndimit të perandorisë Han dhe më të mëdhatë ndër to ishin mbretëritë Dian dhe Yelang, popujt e të cilave mbanin qëndrim miqësor, por nuk kishin shumë njohuri për dinastinë Han. Kjo i tërhoqi perandorit Vudi vëmendje të madhe. Pas disa vjetësh, mbretëritë Dian dhe Yelang u bënë shtete vasale të dinastisë Han dhe perandori u dha mbretërve të tyre vula mbretërore.

Pas disa vjetëve të tjerë, kinezët bënë ekspeditë me rrugë të tjera dhe e gjetën më në fund mbretërinë Hindu dhe vendosën lidhje me të. Kinezët e mëvonshëm e quajtën atë "India". (Zheng)