Të dashur lexues, po fillojmë rubrikën "Tregime dhe legjenda kineze". Sot do t'ju rrëfejmë tregimin historik me titull "Liu Bang themeloi dinastinë Han".

Pasi pastroi mbeturinat e forcave të kundërshtarit të tij Siang Yusë, udhëheqësi fitimtar i kryengritësve fshatarë Liu Bang shpalli krijimin e dinastisë Han. Të gjithë e përkrahën atë që të shpallej si "perandori Gaozu i Hanit". Ai emëroi ndihmësin e tij të ngushtë Siao Hë si kryeministër, i dha këshilltarit të tij të lartë Zhang Liang titullin "lordi Liuhou" dhe gjeneralit Han Sin titullin "lordi i Huaiyinit".

Liu Bang shtroi në pallatin Nangong në Luoyang një banket për nder të të gjithë ministrave dhe funksionarëve, në të cilin ai i pyeti të pranishmit: "Si thoni ju? Pse unë fitova në mbarë vendin dhe pse Siang Yu humbi gjithçka ?"Dy prej tyre iu përgjigjën: "Siang Yu dëmtonte ata që kishin merita dhe dyshonte ata që kishin talent. Kjo është arsyeja pse ai humbi." Liu Bang tha: "Ka edhe diçka që ju nuk e dini. Për të vendosur strategjinë dhe taktikën brenda çadrës ushtarake dhe për të fituar luftën në zona të largëta, unë nuk krahasohem me Zhang Liangun. Për të qetësuar vendin dhe për të furnizuar popullin me ushqime, unë nuk krahasohem me Siao Hënë. Për të bashkuar një ushtri milionëshe, për të siguruar fitoren e luftës dhe marrjen e qyteteve, unë nuk krahasohem me Han Sinin. Të tre personat janë heronj dhe unë i vura ata në postet e përshtatshme. Kjo është arsyeja pse unë fitova në mbarë vendin. Edhe Siang Yu pati persona të shquar, siç ishte Fan Zeng, por ai nuk e shfrytëzoi atë. Kjo është arsyeja pse ai humbi."

Pas disa muajve, Liu Bang shpalli amnisti të përgjithshme dhe pastaj shkoi në krahina të tjera për të zgjidhur rebelimin. Kur ai u kthye në kryeqytetin Çang-an, kryeministri Siao Hë kishte rregulluar gjithçka mirë atje. Ishte përuruar pallati Çangle dhe kishin filluar punimet për ndërtimin e pallatit Veiyang.

Në vitin 195 para erës së re, gjatë udhëtimit për inspektim në krahina të ndryshme, Liu Bangu ndaloi në vendlindjen e tij dhe shtroi një banket për nder të bashkëfshatarëve. Pasi piu raki, ai recitoi vjershën e tij: "Shpërtheu furtuna dhe fluturoi reja. Mbarë vendin e mora dhe në fshatin tim u ktheva. Oh, kam për të mbrojtur territore kaq të gjera, por ku të gjej aq shumë trima?"Pastaj u ngrit për të kërcyer dhe iu mbushën sytë me lot nga mallëngjimi. Po në atë vit, Liu Bang, perandori Gaozu i dinastisë Han, vdiq nga një sëmundje, por dinastia Han, e themeluar nga ai, zgjati rreth 400 vjet.

 Të dashur lexues, dhamë rubrikën "Tregime dhe legjenda kineze".

(Fund)