Rrethi çiklistik i liqenit Qinghai është gara më e famshme ndërkombëtare në krahinat perëndimore të Kinës dhe ka rëndësi të madhe për zhvillimin e krahinave perëndimore dhe për zgjerimin e ndikimit të krahinave perëndimore. Për shkak të vlerave të veçanta tregtare, provinca Qinghai i konsideron garat sportive si një nga mënyrat efektive për nxitjen e zhvillimit ekonomik. Pas garës së çiklizmit rreth liqenit, gara e krosit që kalon Lumin e Verdhë e organizuar nga provinca Qinghai u miratua nga Drejtoria e Përgjithshme Shtetërore e Fiskulturës që të bëhet garë ndërkombëtare. Krahas këtyre, Qinghai po projekton të ndërtojë kampin e parë sportiv të masave popullore në breg të liqenit Qinghai, po ndërton bazën shtetërore të stërvitjes sportive në rrafshnaltë dhe në çdo festë të "1 majit" organizon veprimtarinë masive të ngjitjes në lartësi relievi në malin Yuzhu. Këto veprimtari kanë zgjeruar ndikimin e Qinghait duke i sjellë Qinghait interesa të mëdha ekonomike.

Qinghai është një shembull që nxit zhvillimin ekonomik nëpërmjet sportit, për këtë arsye, drejtori i Drejtorisë së Fiskulturës të Provincës Qinghai Feng Jianping u zgjodh një nga personat me ndikim më të madh në fushën sportive. Feng Jianping tha: "Zakonisht funksionarët sportivë kinezë i kushtojnë vëmendje ngritjes së nivelit të sportistëve për të fituar më shumë medalje, kurse unë i kushtoj kryesisht rëndësi zhvillimit të sektorit sportiv për të nxitur progresin ekonomik të provincës sonë. Kushtet e Qinghait nuk janë shumë të mira, investimet shtetërore janë të kufizuara, prandaj ne vendosëm të zhvillojmë fuqimisht sektorin sportiv duke nxitur nivelin sportiv."

Duke folur për garën e çiklizmit rreth liqenit Qinghai, Feng Jianping tha se zhvillimi me sukses i kësaj gare i ka sjellë sektorit sportiv dhe sektorëve të tjerë të Qinghait raste dhe sfida të mëdha dhe të reja. Gara e çiklizmit ka nxitur zhvillimin e shpejtë të sektorit sportiv të Qinghait. Ai është i mendimit se dobia më e madhe e kësaj gare është forcimi i vetëbesimit të popullit të Qinghait për të arritur suksese.

Me ngritjen e pandërprerë të ndikimit të garës së çiklizmit, shumë ndërmarrje dhe biznesmenë kanë ardhur në Qinghai për investime. Zhvillimi ekonomik ka nxitur zhvillimin e sportit masiv, në të kaluarën në çdo 400 fshatra kishte vetëm një fushë të basketbollit ndërsa tani në çdo fshat ka pajisje themelore sportive. Feng Jianping tha: "Sepse tani kemi para për të zhvilluar sportin masiv." (Fani)