Në qytet kudo ka punëtorë të ardhur nga fshati, megjithatë, vitet e fundit, në disa krahina bregdetare të Kinës u duk mungesa e punëtorëve të ardhur nga fshati, veçanërisht e punëtorëve teknologjikë. Sipas anketës, në vitin 2005, vetëm në provincën Guangdong do të mungojnë 1 milionë punëtorë të ardhur nga fshati, disa ndërmarrje me teknologji të lartë në deltën e Lumit Zhujiang nuk do të pranojnë punëtorë të mjaftueshëm.

Si një vend me 1.3 miliardë popullsi, Kina ka burime të pasura njerëzore, prandaj qeveria dhe organet përkatëse i kanë kushtuar vëmendje të madhe këtij problemi. Kryetari i provincës Guangdong Huang Huahua tha se në vitin 2003, në provincën Guangdong punonin 13 milionë punëtorë të ardhur nga fshati, kurse në vitin 2004, ky numër u shtua në 16 milionë veta. Në fakt, në disa ndërmarrje mungojnë punëtorë të përgatitur teknologjikë. Sipas anketës ndër 290 ndërmarrje të provincës Guangdong, mungojnë 18.2% të punëtorëve teknologjikë.

Shefi i zyrës studimore të politikave të provincës Henan Yang Chunyu është i mendimit se shkaku i vërtetë i mungesës së punëtorëve të ardhur nga fshati është pagarancia e të drejtave themelore të tyre, për shembull pagesat e ulëta, mjedisi i keq i punësimit etj. Ekonomisti Wu Jinglian vuri në dukje: "Edhe punëtorët e ardhur nga fshati duhet të gëzojnë dobi të rritjes së shpejtë ekonomike."

Për të zgjidhur këtë problem, kryetarja e Sindikatës Bujqësore të Kinës Wang Ping është e mendimit se detyrat kryesore janë përsosja e politikave dhe rregulloreve ligjore përkatëse, zbatimi i rreptë i ligjit dhe nxitja e sistemit të kontratës së punës.

Edhe shumë krahina dhe ndërmarrje që pranojnë punëtorë të ardhur nga fshati kanë njohur rëndësinë e tyre për zhvillimin ekonomik. Në vitin 2004, qyteti Dongguan i provincës Guangdong mori masat përkatëse për t'u krijuar punëtorëve të ardhur nga fshati mjedis të mirë punësimi. Qysh nga 1 janari i vitit 2005, provinca Zhejiang hoqi sistemin e regjistrimit të punëtorëve të ardhur nga fshati për punësim dhe fshatarët mund të gjejnë punë në qytet vetëm nëpërmjet letërnjoftimit të vet.

Krahas këtyre, shumë krahina kanë filluar t'i kushtojnë rëndësi përgatitjes së punëtorëve të ardhur nga fshati me qëllim që ata të zotërojnë aftësitë themelore të punës dhe të përputhen me kërkesat e punësimit në qytet. Provinca Sichuan është provinca që eksporton fshatarët më të shumtë në qytet për punësim. Në vitin 2004, "Programi i përgatitjes së fshatarëve" përgatiti gjithësej 9.7 milionë fshatarë që punojnë nëpër qytete.

Njëkohësisht, këtë vit, Ministria e Punës dhe e Sigurimeve Shoqërore e Kinës filloi të zbatojë në mbarë vendin "Programin e erës së pranverës" me qëllim që të forcohen shërbimet ndaj fshatarëve që punojnë në qytet. (Fani)