Hajde Dajde Djalo

Pas kuintave, me ethet e votimit

Ishin mbledhur rreth një televizori në korridorin e madh që të shpie drejt skenës. Dikush me një fustan të pambërthyer mirë, dikush duke nxituar për të qenë gati për në skenë, dikush me flokët e pakrehura ende, e paralelisht me këto shqetësime, mbërtheheshin aty pas ekranit duke ndjekur garën që sapo kishte nisur. E para ishte Mariza Ikonomi, e cila ka marrë çmimin "Look"me këngën "Piano e vjetër".

Vlerësimi ishte mjaft i lartë për të. Nga votimet e jurisë Mariza fitoi 72 pikë. Më tej radha vijoi me të tjerë këngëtarë, e grupe. Pikët e larta të dhëna nga juria për këngët e para, pasuan më tej me një "skandal" vlerësimesh. Rregulli ishte që një anëtar jurie, nuk kishte të drejtë të përdorte dy herë të njëjtën notë (vlerësim në pikë). E kështu këngëtar pas këngëtari, vlerësimet e jurisë, nisën të jenë pak jashtë normales. Dukej se aty nuk kishte vlerësime reale.

Pas gjysmës së këngëve, anëtarët e jurisë, me shumë dhembshuri mblidhnin supet e sikur thonin, kjo më ka mbetur (për pikët e mbetura në dorë, e që s'kishin mundësi t'i nxirrnin për vlerësime). Ndërkohë, në radhët e këngëtarëve, nisën ethet. Ishin ethe të pazakonta. Nuk po mund ta kapërdinin atë rregull i cili më shumë e çorodiste garën se sa jepte vlerësime. Alketa shprehej e shqetësuar se anëtarët e jurisë e shihnin me keqardhje ngaqë nuk kishin mbetur më pikë për të vlerësuar.

Po ashtu me të njëjtat ethe është futur edhe Flori në garë, megjithëse për të juria, dha pikë të larta. Ndërsa Alma Bektashi, e mbërthyer pas ekranit, ende nuk po mundej ta ftillonte gjithë këtë lëmsh. Ajo i drejtohej Alketës dhe e pyeste sërish e sërish, për këtë gjykim të jurisë. Në të vërtetë ajo ishte e fundit në këtë garë, e derisa radha të shkonte tek ajo me siguri, që në dorën e jurisë do të mbeteshin vetëm, shifrat, dy, tre, katër, pesë, apo edhe ndonjë gjashtë në të rrallë.

Herë me shaka e herë me seriozitet, pyetjet rreth këtij vlerësimi, u bënë edhe më të shpeshta. Derisa më në fund u pa se vlerësimi, nuk mund të quhej më një vlerësim real. Sidoqoftë atyre iu duhej ta vazhdonin garën. Të mjaftoheshin edhe me çmimet e shumta që kishin marrë, dikush çmimin "Look", dikush "Millenium", dikush "Kënga hit", dikush "Çmimin e rinisë", dikush tjetër, çmimin e kritikës, "Magjia e parë", "Interpretimi më i mirë", etj?.

Kështu nuk kishte më vend për habi, as kur Elton Deda, u vlerësua me pak pikë, e kur ndonjë nga anëtarët e jurisë, ngriti lart 1-shin apo 2-shin. Nuk u habitën as kur Alma Bektashi, mori një vlerësim të tillë, sepse gjithçka u duk e parashikueshme, që në krye të herës.

(Nga Shekulli.com) http://www.shekulli.com.al/kulture/25nentor2002/kengetaret.shtml