Në një konferencë shtypi që u organizua më 31 janar, në Pekin, nënkryetari i zyrës së grupit drejtues qendror e financiar të Kinës, z. Chen Xiwen tha se në vitin 2005, Kina do të vazhdojë dhe do të forcojë politikën e zbatuar gjatë vitit të kaluar, për përkrahjen e zhvillimit të bujqësisë. Njëkohësisht, Kina do të ngrejë me të gjitha forcat aftësinë komplekse të prodhimit të bujqësisë për shtimin e sasisë së prodhimit të drithërave.

Në fillim të vitit të kaluar, Kina publikoi një dokument të rëndësishëm drejtues për zhvillimin e bujqësisë dhe ka ndërmarrë përkatësisht një sërë politikash. Përmbajtjet e këtyre politikave janë pakësimi dhe anulimi i taksave të bujqësisë, dhënia e subvencioneve në para për fshatarët etj. Zbatimi i këtyre politikave ka mobilizuar shumë entuziazmin e fshatarëve për prodhimin e drithërave. Vitin e kaluar, prodhimi i përgjithshëm i drithërave në Kinë kaloi objektivin e parashikuar prej 455 miliardë kg, të ardhurat bruto mesatare të fshatarëve për frymë u shtuan me 300 juanë. Kjo shifër ishte më e lartë se objektivi i përcaktuar në fillim të vitit 2004.

Për vazhdimin e përkrahjes së zhvillimit të bujqësisë dhe për nxitjen e shtimit të të ardhurave të fshatarëve, ditët e fundit, qeveria kineze publikoi përsëri një dokument të rëndësishëm orientues për zhvillimin e bujqësisë. Në një konferencë shtypi, të organizuar, ditët e fundit, nga zyra informative pranë Këshillit të Shtetit të Kinës, z. Chen Xiwen vuri në dukje se publikimi i këtij dokumenti ka rëndësi shumë të madhe.

Nga fillimi i vitit të kaluar, qeveria kineze e publikoi përsëri këtë dokument të rëndësishëm, me qëllim që të sqarohej para fshatarëve se politikat e vlerëshme nuk ka pse të ndryshojnë. Krahas forcimit të potencialit shtetëror, do të forcohet më tej ndihma për bujqësinë dhe fshatarët.

Sivjet, edhe në 16 provinca, rajone autonome dhe qytete të Kinës do të anulohen taksat bujqësore. Zoti Chen Xiwen është i mendimit se sipas gjendjes aktuale të zhvillimit, objektivi i parashtruar vitin e kaluar nga Kina për anulimin e plotë të taksave bujqësore brenda 5 vjetëve do të realizohet para afatit. Vitin e kaluar, investimet e sektorëve financiarë të niveleve të ndryshme të Kinës në bujqësi i kaluan të 200 miliardë juanët. Parashikohet se investimet e tyre të këtij viti në bujqësi do të jenë më të shumta se viti i kaluar.

Siç mësohet, politikat kineze për përkrahjen e bujqësisë përputhen plotësisht me rregullat e subvencioneve bujqësore të Organizatës Botërore të Tregtisë.

Megjithëse prodhimi i vitit të kaluar i drithërave të Kinës u shtua, që nga viti 2000 e deri tani, në Kinë ka ekzistuar vazhdimisht problemi i kërkesës dhe i ofertës. Vitin e kaluar, sasia e kërkesës së përgjithshme të drithërave të vendit ishte 490 miliardë kg. Kjo shifër ishte 35 miliardë kg më shumë se sasia e prodhimit të parashikuar të drithërave. Njëkohësisht, në zhvillimin e bujqësisë kineze ekzistojnë disa faktërë të pafavorshëm, si pakësimi i tokave të punueshme, transformimi i infrastrukturës së vjetër hidraulike në bujqësi, mungesa e rezultateve shkencore e studimore të bujqësisë etj. Prandaj, në dokumentin orientues, të publikuar këtë vit nga qeveria kineze për zhvillimin e bujqësisë, vihet në dukje se Kina do të përpiqet për ngritjen e aftësisë së prodhimit kompleks të bujqësisë dhe për shtimin e prodhimit të drithërave.

Duke folur për këtë, z. Chen Xiwen tha se mund të thuhet se ngritja e aftësisë së prodhimit të tokave, e theksuar në këtë dokument të rëndësishëm, e ka për qëllim zvogëlimin gradual të mungesës së prodhimit të drithërave.

Ai tha, gjithashtu, se për të ngritur aftësinë e prodhimit kompleks të bujqësisë, Kina do të marrë disa masa kryesore, të cilat janë: ruajtja e tokave të punueshme e përmirësimi i mjedisit ekologjik, forcimi i ndërtimit të veprave hidraulike, nxitja e përparimit të shkencës dhe teknikës bujqësore, forcimi i përgatitjes së fshatarëve, ngritja e cilësisë së fshatarëve etj.

Përveç këtyre, në këtë dokument vihet në dukje gjithashtu se sivjet, Kina do të vazhdojë të punojë për zvogëlimin e dallimeve midis qytetit dhe fshatit në arsimin e detyrueshëm, në mjekimin themelor etj. (Sihai)