Si shenjë e Lojërave Olimpike, Komiteti Olimpik Ndërkombëtar dhe çdo Komitet Organizativ i këtyre Lojërave i kushtojnë rëndësi të madhe kafshës fatsjellëse, sepse kjo figurë ka dy qëllime kryesore: paraqitjen e synimit të organizatorëve të Lojërave Olimpike dhe marrjen e fitimeve ekonomike. Në gusht të vitit të kaluar, Komiteti Organizativ i Lojërave Olimpike të Pekinit u lëshoi institucioneve profesioniste projektuese dhe projektuesve të mbarë botës ftesa për projektimin e figurës-kafshë fatsjellëse të Lojërave Olimpike të Pekinit. Rezultati do të zbulohet në qershor të këtij viti. Komiteti Organizativ i Lojërave Olimpike të Pekinit ka paraqitur standarde konkrete për figurën-kafshë fatsjellëse, funksionari kulturor i këtij komiteti Chen Pingxian tha:

"Së pari kjo figurë-kafshë duhet të jetë e lezetshme dhe të pranohet nga grupet e ndryshme shoqërore; së dyti, të ketë karakteristika të reja dhe dallime nga figurat e tjera-kafshë fatsjellëse të Lojërave të tjera Olimpike; së treti, të ketë karakteristika kulturore kineze."

Komiteti Organizativ i Lojërave Olimpike të Pekinit theksoi se kafsha fatsjellëse duhet të ketë vlerë tregtare që të përputhet me standardin e prodhimit të produkteve të ndryshme olimpike.

Me ftesë të Komitetit Organizativ të Lojërave Olimpike të Pekinit, shumë provinca e rajone kineze propozuan mjaft kafshë fatsjellëse, për shembull provinca Sicuan ? vendlindja e pandës propozoi që panda të jetë kafsha fatsjellëse e Lojërave Olimpike të Pekinit dhe ftoi posaçërisht shumë specialistë për të projektuar figurën e pandës. Qinghai, Xinjiangu dhe Tibeti propozuan së bashku antilopën tibetiane, kurse Helongjiangu e Pekini propozuan përkatësisht kurrillën dhe tigrin e Kinës jugore. Njëkohësisht shumë vebsaite të famshme kineze hapën faqe të posaçme elektronike për të zgjedhur kafshën e fatit duke tërhequr mbi 1 milion vizitues në votime.

Krahas kafshëve tradicionale, shumë specialistë shpresojnë se mund të zgjedhet një kafshë e re. Një nga projektuesit e emblemës së Lojërave Olimpike të Pekinit Guo Cunning tha:

"Krahas shfaqjes së frymës olimpike, kafsha e fatit duhet të ketë vlera tregtare dhe duhet të ketë të drejta të plota të pronësisë intelektuale. Shpresoj se kafsha e fatit e Lojërave Olimpike të Pekinit do të ketë karakteristika të reja dhe do të pasqyrojë kulturën kineze."

Megjithëse ka shumë kandidatë të mirë për këtë figurë fatsjellëse, specialistët kanë arritur në përfundimin se kafsha fatsjellëse e Lojërave Olimpike të Pekinit jo vetëm duhet të ketë karakteristika kulturore kineze, por edhe duhet të ketë ndikim të madh në mbarë botën. Besojmë se këtë verë do të jetë zgjedhur patjetër figura përfaqësuese e Lojërave Olimpike të Pekinit. (Fani)