Më 13 shkurt të vitit 1980, doli në qarkullim seria e parë e pullave olimpike të Kinës. Deri tani ato pulla kanë një histori 21 vjesore. Nga 13 deri më 24 shkurt të vitit 1980, u organizuan në liqenin Placid të SHBA-së Lojërat e 13-ta Olimpike Dimërore, ku ekipi i Kinës mori pjesë për herë të parë. Për këtë, Ministria e Postës dhe e Telekomunikacionit e Republikës Popullore të Kinës nxorri në qarkullim një seri pullash përkujtimore të "Lojërave të 13-ta Olimpike Dimërore".

Nxjerrja e këtyre pullave është e lidhur ngushtë me rikthimin e Kinës dhe rivendosjen e të drejtave të saj të ligjshme në Lojërat Olimpike. Kur Lojërat e para Olimpike u organizuan më 1896, autoritetet e Kinës së vjetër refuzuan të merrnin pjesë në to. Pas Revolucionit Xinhai të Kinës në vitin 1911, Kina u pranua zyrtarisht në Komitetin Olimpik Ndërkombëtar. Përfaqësuesi kinez Dong Shouyi u zgjodh anëtar i Komitetit Olimpik Ndërkombëtar. Pas shpalljes së Kinës së re më 1949, Dong Shouyi vazhdoi aktivitetin e tij në Komitetin Olimpik Ndërkombëtar, në mbledhjen e 53-të të Komitetit Olimpik Ndërkombëtar ai mbajti një fjalim, ku kërkoi formimin e Komitetit Olimpik të Republikës Popullore të Kinës. Kjo kërkesë u pranua në këtë mbledhje. Por më pas, të gjitha aktivitetet e Komitetit Olimpik Ndërkombëtar kontrolloheshin nga kryetari i 5-të i tij, amerikani Arery Brundage dhe një numër i vogël njerëzish antikinez. Ata ftuan organizatën sportive të Tajvanit të merrte pjesë në Komitetin Olimpik Ndërkombëtar në emër të "Komitetit Olimpik të Kinës". Ky veprim nuk u miratua dhe votua në asnjë mbledhje. Në gusht të vitit 1958, Kina ndërpreu lidhjet me Komitetin Olimpik Ndërkombëtar, dhe Dong Shouyi dha dorëheqje nga funksioni i anëtarit të Komitetit Olimpik Ndërkombëtar.

Më 1975, Kina i paraqiti Komitetit Olimpik Ndërkombëtar një kërkesë për rivendosjen e të drejtave dhe të statusit të saj të ligjshëm. Nëpërmjet përpjekjeve shumëpalëshe, më 26 nëntor të vitit 1975, të gjithë anëtarët e Komitetit Olimpik Ndërkombëtar miratuan me votë rezolutën për rivendosjen e pozitës së ligjshme të Republikës Popullore të Kinës në Komitetin Olimpik Ndërkombëtar dhe për përdorimin e flamurit dhe të himnit kombëtar të Republikës Popullore të Kinës në Lojërat Olimpike. Në Lojërat e 13-ta Olimpike Dimërore të zhvilluara në shkurt të vitit 1980, Kina dërgoi 28 sportistë për pjesëmarrje në 4 gara dimërore, duke përfshirë patinazhin artistik, ski etj. Kur u përhap lajmi mbi rivendosjen e pozitës së ligjshme të Kinës, Ministria e Postës dhe të Telekomunikacionit e Kinës projektoi dhe prodhoi vetëm brenda 3 muajve një seri pullash të Lojërave të 13-ta Olimpike Dimërore. Tirazhi i këtij kompleti pullash ka arritur në 1.5 milionë. Vizatimet e pullave janë përkatësisht stema e Lojërave Olimpike të Republikës Popullore të Kinës, patinazhi artistik, ski etj. Stema e komitetit olimpik të Kinës u duk për herë të parë në pullën e Kinës. Kjo stemë përbëhet nga flamuri i Republikës Popullore të Kinës, dhe nga rrathët 5 ngjyrëshe: blu, e verdhë, e zezë, e gjelbër, kuqe, që simbolizojnë bashkimin dhe miqësinë midis sportistëve dhe popujve të 5 Kontinenteve. (Shyguan)