Korrespondenti i Agjensisë Kineze të Lajmeve Hsinhua mësoi, më 17 janar, nga Drejtoria e Arsimit të provincës Guixhou të Kinës se numri i studentëve të shkollave të larta të provincës Guixhou që studiojnë me bursa shtetërore, ka arritur në 20 mijë. Si rezultat i punës për dhënien studentëve të bursave shtetërore, të gjithë studentët e varfër ekonomikisht në këtë provincë mund të vazhdojnë studimet.

Sipas njoftimeve të Zyrës së arsimit të provincës Guixhou, nga gjysma e dytë e vitit 2002, për tre vjet me radhë provinca Guixhou ka shtuar 13 % kredi në vit për studentët, shifër kjo që është më e lartë se niveli mesatar i mbarë vendit prej 6.6%. Numri i studentëve të provincës Guixhou që kanë përfituar bursë nga shteti, zë vendin e parë në Kinë. Njëkohësisht, deri tani nuk ka patur asnjë mosmarrëveshje midis bankave dhe studentëve dhe të gjitha shkollat e larta kanë respektuar marrëveshjet e nënshkruara me bankat për dhënien studentëve të bursave.

Për të nxitur më tej këtë punë, në gusht të vitit 2004 provinca Guixhou ka hartuar edhe rregullat përkatëse, për të garantuar studimet e rregullta të studentëve në shkollë dhe për të garantuar shlyerjen e kredive pas studimeve.

Vitin e kaluar në të gjithë provincën Guixhou kishte 2156 studentë që kanë përfituar bursa shtetërore, dhe shuma e këtyre bursave ka arritur 11 milionë e 700 mijë juanë.

Para vitit 2010 në Kinë do të krijohet një sistem i ri i agroteknikës.

Më 16 janar, kryetari i Akademisë së Shkencave Bujqësore të Kinës, Xhai Fuji u shpreh se brenda 3 deri 5 vjetëve të ardhshëm Kina do të përfundojë transformimin e sistemit të makro-kontrollit dhe rregullimin e strukturës së shkencave bujqësore, dhe nëpërmjet krijimit të 50 qendrave eksperimentale të agroteknikës dhe të 300 stacioneve eksperimentale, do të krijohet në vitin 2010 sistemi i krijimtarisë agroteknike të Kinës që përshtatet me sistemin e ekonomisë socialiste të tregut, me ligjin e zhvillimit të agroteknikës dhe me karakteristikat themelore të bujqësisë dhe të fshatit kinez.

Sipas planit, në Pekin do të ndërtohet një qendër shtetërore e krijimtarisë agroteknike. Krahas kësaj, do të ndërtohen edhe 10 qendra të tjera të tilla në Kinën veri-lindore, në rjedhat e Lumit të Verdhë dhe të Lumit Huai, në rjedhat e Lumit Jance, në Kinën jugore, në Mongolinë e Brendshme dhe në Rafshnaltën Çinhai-Tibet, me institucionet e eksperimentimeve agroteknike dhe shkollat e larta të provincave, si subjekte.. Këto qendra do të përgjigjen për seleksionimin e produkteve bujqësore, sidomos për sistemimin e strukturës së prodhimit të drithërave, për krijimin e sistemit të prodhimit bujqësor dhe të teknologjive të përpunimit, për zhvillimin e përgjithshëm të bujqësisë dhe për krijimin e mjedisit ekologjik të bujqësisë. ( zhang )