Tenisi quhet sporti i aristokracisë botërore dhe lindi në Francë në shekullin e 12-të. Në vitin 1885, misionarë dhe biznesmenë të huaj e sollën sportin e tenisit në qytete të mëdha kineze si Shangai, Guangxhou etj. Më vonë, disa shkolla fetare filluan të zhvillonin këtë sport. Për shkak të terreneve sportive dhe pajisjeve të shtrenjta, në të kaluarën, vetëm të pasurit mund të luanin tenis.

Me zhvillimin e shpejtë të ekonomisë kineze, tani tenisi është përhapur në mbarë vendin. Shefi i komisionit të informacioneve të Shoqatës së Tenisit të Kinës Xiao Ning tha:

"Reforma dhe hapja ndaj botës së jashtme e Kinës ka nxitur zhvillimin e shpejtë të sportit të tenisit në Kinë. Tenisi është një sport shumë i kushtueshëm dhe profesionist, por me shtimin e të ardhurave, edhe banorët e thjeshtë mund të merren me këtë sport."

Xiao Ning tha se në vitin 2004, më se 5000 persona morën pjesë në garat amatore të tenisit të organizuar nga Shoqata e Tenisit të Kinës, njëkohësisht kishte edhe 200 mijë persona që morën pjesë në garat amatore të tenisit të organizuara nga shoqata lokale të tenisit dhe organizata tregtare. Sipas statistikave, tani afro 2 milionë kinezë merren me sportin e tenisit.

Si qendra e sportit të tenisit, Pekini ka mbi 1000 terrene të tenisit dhe afro 100 klube të tenisit. Çdo fundjavë, organizohen shumë gara dhe ushtrime. Trajneri privat i tenisit Hang Ronghua tha:

"Tani luajtja e tenisit është një gjë e zakonshme në Kinë. Krahas të pasurve, edhe banorët e thjeshtë mund të merren me këtë sport, përshembull shumica e sportdashësve të tenisit në Pekin janë banorë të thjeshtë."

Shefi i komisionit të informacioneve të Shoqatës së Tenisit të Kinës Xiao Ning tha se tani tenisi kinez po zhvillohet shumë mirë, Shoqata e Tenisit e Kinës do të marrë një sërë masash për të nxitur dhe standardizuar më tej zhvillimin e tenisit në Kinë. Ai tha:

"Për të shtuar njohjen e publikut për sportin dhe kulturën e tenisit, Shoqata e Tenisit e Kinës do të bëjë disa punë drejtuese, së pari në vitin 2005 do të publikojmë standardin e terreneve të tenisit; së dyti, këtë vit do të organizojmë vazhdimisht disa gara të mëdha për amatorë; së treti do të përhapim sportin e tenisit tek fëmijët për të përgatitur talente të reja të tenisit." (fani)