Ai i tregoi korrespondentes Huailu se ky film u shfaq për herë të parë në premierën e Festivalit të 38 Ndërkombëtar të Filmit në Karlovi Vari të Çekisë dhe është vlerësuar lart nga juria e këtij festivali.

Në fillim të këtij filmi, paraqitet plaka që shtyp kafenë në gur, një nënë ia vë veshin murit dhe dëgjon. Krahu i punës ka ikur në kurbet, ndërsa në terasat e shtëpive të fshatit thahen rrobat e zeza të nënave. Era i lëviz degët e një druri ku është lidhur litari i këmbanës...

Skenari i Roland Gjozës paraqet një fëmijë të cilin e kthejnë në fshat tek gjyshja. "Nëna e dërgon beben e sapolindur, e rikthen në fshat tek gjyshja dhe i lutet të jëmës së vet, i thotë e dashur mama, a mund ta mbash nipin se ne punojmë gjithë ditën dhe nuk e mbajmë dot. Ky fëmijë është si një engjëll për banorët e fshatit, fshatit i rikthehet dëshira për jetën. Ata zgjohen nga gjumi letargjik në të cilin kanë rënë dhe fillojnë të mendojnë vetëm për fëmijën. Fillojnë të bëjnë rroba për të, fillojnë të pastrojnë oborrin, ngrejnë muret e shtëpisë, lyejnë shtëpitë zbukurojnë fshatin për hir të fëmijës", thotë babai i regjisorit Eno Milkani, Piro Milkani.

Pamje magjepse të natyrës e bëjnë këtë film me metrazh të shkurtër interesant. Por çfarë ndodh kur fëmija rritet e do kërkojë të largohet për një jetë më të mirë diku tjetër?

Kamera jep pamjen e nipit në djep, i rrethuar me plakat e fshatit, të cilat i thurin rroba nga lëmshat lloj-lloj ngjyrash.

Bëhen gazmende, darka e qejfe, fëmija pagëzohet në ritualin me ujë në oborr. Por, uji që bie në trupin e njomë të foshnjes, rrëshqet teposhtë enës së bakrit, rrëshqet gurëve të oborrit, të sokakut, përzihet me rrëkenë e fshatit dhe derdhet në det. Z. Piro Milkani tha se në gjithë filmin nuk ka asnjë fjalë, vetëm muzikë dhe filmi mbyllet me njoftimin se 1 milion shqiptarë kanë lënë Shqipërinë për të punuar në mërgim.

Ky film ishte simbolik, me plot emocione dhe se u ka pëlqyer shumë shikuesve.

Pasi kaloi me sukses provën e parë "Edeni i Braktisur" i Eno Milkanit, mori pjesë në Festivalin e 33 të Filmit në Kiev të Ukrajinës, ku dhe mori çmimin e parë si filmi më i mirë me metrazh të shkurtër. Juria fare sekrete, nuk iu dha asnjë shans konkurrentëve për të mësuar qoftë edhe minutën e fundit të natës së çmimeve se cilët do të ishin fituesit e mundshëm. Ngjarja u zhvillua në kryeqytetin ukrainas nga 25 tetor deri më 2 nëntor. Në këtë seksion konkurrues merrnin pjesë rreth 28 filma nga gjithë Europa.

Pastaj ky film fitoi edhe në festivalin kinematografik të Sarajevës dhe mori një çmim special edhe në festivalin e parë ndërkombëtar të filmit me metrazh të shkurtër në Tiranë.

Z. Piro tha se ky film që pasqyron realitetin e Shqipërisë është shfaqur edhe në Seul të Koresë, në Greqi dhe në shumë vende të tjera të botës. Ai është i bindur se edhe spektatorëve kinezë do të interesohen për filmin me metrazh të shkurtër " Edeni i Braktisur " (zhai)