Zv-shefi i Komisionit të Tregtisë së Jashtme të Shangait Liu Jinping tha se pas krijimit në vitin 1981 në Shangai të Kompanisë së Tekstileve me investime të përbashkëta të Shangait dhe të Honkongut, Honkongu është bërë vendi që ka bërë investimet më të shumta të huaja në Shangai.

Deri në fund të shtatorit, Honkongu realizoi investime në 10 mijë dhe 823 projekte të Shangait me një vlerë prej mbi 20 miliardë dollarësh, shifër kjo që zuri 31% të vëllimit të përgjithshëm të projekteve të investimeve të huaja në Shangai. Nga janari deri në shtator të këtij viti, u shtuan 673 projekte të reja me investime të Honkongut me një vlerë prej 1.9 miliardë dollarësh. Liu Jinping tha se këto shifra tregojnë se janë shtuar pandërprerë investimet e Honkongut në Shangai.

Sipas anketës, biznesmenët e Honkongut i kushtojnë vëmendje të madhe Panairit Botëror të Shangait të vitit 2010. Këtë vit, në Shangai dhe Honkong janë zhvilluar disa herë simpoziume për investime në panairin botëror të vitit 2010, bashkëpunimin midis dy palëve etj duke tërhequr shumë biznesmenë të Honkongut.

Pasi hyri në fuqi "marrëveshja e krijimit të marrëdhënieve më të ngushta ekonomiko-tregtare midis pjesës kontinentale të Kinës dhe Honkongut", bashkëpunimi ekonomiko-tregtar midis dy palëve është bërë më i ngushtë. Sipas statistikave të fundit, nga janari deri në tetor të këtij viti, vëllimi i përgjithshëm tregtar midis Shangait dhe Honkongut arriti në 6.5 miliardë dollarë duke u shtuar 6.9% në krahasim me të njejtën periudhë të vitit të kaluar. Deri në fund të shtatorit, vëllimi i përgjithshëm monetar i mallrave të Honkongut të importuara në Shangai arriti në 250 milionë dollarë.

Bëhet e ditur se për t'iu afruar më tej kërkesave të "marrëveshjes së krijimit të marrëdhënieve më të ngushta ekonomiko-tregtare midis pjesës kontinentale të Kinës dhe Honkongut", qeveria lokale e Shangait do të krijojë edhe një institucion të posaçëm të punëve të Honkongut dhe të Makaos për të ndihmuar më shumë kompanitë e Honkongut dhe të Makaos që të investojnë në Shangai. (fani)