Filmat shqiptarë të xhiruar në vitet '60 dhe '70, u kanë lënë spektatorëve kinezë të asaj kohe kujtime shumë të bukura e të paharrueshme dhe kanë ushtruar një ndikim të madh në gjirin e tyre, sidomos të fëmijëve të asaj kohe. Shkrimtarja e njohur kineze Tie Ning në dy romane të saj përmend filmin shqiptar "Ngadhnjim mbi vdekjen", bile në njw prej tyre, personazhja kryesore përfytyronte të bëhej një heroinë e guximshme, si ajo e rolit kryesor të filmit shqiptar "Ngadhnjim mbi vdekjen" Mira, që nuk përkulej përpara fashistëve italianë. Parrulla e këtij filmi "vdekje fashizmit - liri popullit" qe bërë një thënie klasike e asaj kohe, shumë e përdorur nga kinezët. Novelisti kinez Lv You An duke kujtuar kohën e fëmijërisë tha se filmat e bukur shqiptarë siç janë "Ngadhnjim mbi vdekjen ", " Njësiti Guerril " etj, janë bërë pjesë e një faze të jetës së njeriut kinez . Regjisori dhe artisti i njohur kinez Gjan Ven që e ka fituar shumë herë çmime në festivalet ndërkombëtare kinematografike ka përmendur më se një herë për filmin shqiptar bardhë e zi " Ngadhnjim mbi vdekjen ", duke e quajtur atë si një film shumë të bukur romantik, bardhë e zi. Nën ndikimin e këtij filmi, edhe ai xhiroi një film bardhë e zi, ku denoncohen veprimet kriminale të pushtuesve japonezë në Kinë. Ndërsa regjizori i njohur kinez Zhao Bao Gang, që ka realizuar shumë filma të preferuar televizivë, ka thënë se komeditë u japin spektatorëve një kënaqësi psikologjike, pa u lënë përshtypje të thella, kurse tragjeditë lenë gjurmë të thella në ndërgjegjen e njerëzve. E kam parë filmin shqiptar 'Ngadhnjim mbi vdekjen' në kohën kur isha nxënës i shkollës së mesme. Çasti i daljes së asaj vajze trime në vendin e ekzekutimit m'u ka rrënjosur thellë në mendje dhe, edhe tani ndjej një dhimbje të madhe kur kujtoj atë fragment. Në parathenien e albumit me këngë të filmave të vjetër artistikë , projektuesi i këtij albumi, drejtuesi i njohur televiziv i CCTV-së CuiYong Yuan, ndër të tjera shkruan : Ndjenjat e dashurisë dhe të miqësisë janë të paçmuara, e tillë është p.sh dashuria ime për filmat e vjetër artistikë. Dje e ndoqa edhe një herë filmin shqiptar "Ngadhnjim mbi vdekjen ". Në fund të këtij filmi ështe një pasazh i tillë: një oficer nazist tregohet human, duke thënë fjalët më të bukura për atë vajzë komuniste: "Jeta është e bukur, o vajzë, çdo njeri ka vetëm një jetë. Jashtë ndriçojnë rrezet e ndritura të diellit, njerëzit po kënaqen me të gjitha gëzimet e jetës, kurse ti po vuan në burg dhe do të humbësh jetën." Dhe më tej, ai vazhdon: " Çdo njeri ka interesa personale, por në bazë të një besimi a një ideje, ai kthehet në një njeri të interesave të të tjerëve. Vetëm në prag të vdekjes, ai do të mendojë për interesat e vetëm . Ti do të humbësh të kaluarën e bukur ". Vajza simpatike Mira pasi pa me mall qytetin e saj të bukur, zgjodhi vdekjen dhe jo nënshtrimin . Z.Cui tha: " 'Ngadhnjim mbi vdekjen' është një koncept e frymë shpirtërore e brezit të atëhershëm. Me besimin për një synim të caktuar, mund të luftosh duke sakrifikuar gjithçka. Ja, kjo ka qenë fryma, me të cilën jam rritur dhe që mua më pëlqen." Koleksionisti i reklamave të filmave Fen Gjen Zhong e ka filluar koleksionin e tij të reklamave qysh në vitin 1969 , kur ishte l0 vjeç. Reklama e parë që mblodhi ishte reklama e filmit shqiptar " Ngadhnjim mbi vdekjen ", të shqitur nga muri i një kinemaje. Edhe banorë të thjeshtë kinezë kanë treguar një interesim të madh për filmat shqiptarë. Lidhur me këtë ambasadori i Shqipërisë në Kinë Kujtim Xhani tha : " Gjatë gjithë kohës që kam qënë në Pekin, kam vënë re se edhe njerëz të thjeshtë janë shumë të interesuar për filmat shqiptare. Gjatë takimeve me njerëz të ndryshëm ka vënë re se, ata i dinë edhe vargjet e këngëve dhe fishkëllëjnë melodi të filmave shqiptarë. " Dhe me të vërtetë, spektatorët kinezë kanë mjaft dëshirë që të shohin filma të rinj shqiptarë. Ata gëzohen shumë për sukseset e kinematografisë shqiptare dhe urojnë që Shqipëria të arrijë suksese të reja në fushën e kinematografisë.(Zhai)